रौतहट - सर्लाहीस्थित प्रहरी गस्ती टोलीले १५ लाख मूल्य बराबरको सुन चाँदीको गरगहना सहित भारतीय नम्बर प्लेटको एक थान स्कर्पियो गाड़ी बरामद गरेको छ।

विआर ३० एके ७२२० नम्बरको स्कर्पियो गाडीमा उक्त परिमाण बराबरको विभिन्न किसिमका गहना बरामद भएको सर्लाही प्रहरीले आज सोमवार सार्वजनिक गरेको हो। बरामद सरसामान सहित स्कर्पियो गाड़ी आवश्यक कारबाहीको लागि आइतबार साँझ सर्लाही भन्सार कार्यालय, मलंगवामा पठाइएको प्रहरीको सूचनामा उल्लेख गरिएको छ ।

गत ७ गते बिहान साढे ९बजे लालबन्दी नगरपालिका १ जिल्ला ट्राफिक कार्यालय नवलपुर अगाडी पूर्वपश्चिम लोकमार्गमा ट्राफिक प्रहरीले नियमित चेकजाँच टोलीले चेकजाँचको क्रममा पश्चिमबाट पूर्व तर्फ जाँदै गरेको उक्त स्कर्पियो गाड़ी नियन्त्रणमा लिएको थियो। चेकजाँच गर्दा साथमा भन्सार कागजात नभएको र चालकले मदिरा सेवन गरेको अवस्थामा फेला पारेको थियो।

मदिरा सेवन नगरेको अर्को चालक बोलाउनुस् र ट्राफिक नियमानुसार जरिबाना काटी जानुहोला भनि जानकारी गराउदाँ निजहरू आवश्यक कागजातहरू मगाई अर्को चालक समेत लिई आउने भनि चालक सहित चार जना पुरुष व्यक्तिहरू) गाडी छाडी गएको जिल्ला प्रहरी प्रवक्ता डिएसपी सरोज राईले बताएका छन्।

धेरै समयसम्म पनि नआए पश्चात् शंका लागी सवारी नियन्त्रणमा लिई घटनाको सम्बन्धमा ईलाका प्रहरी कार्यालय लालबन्दीबाट मुचुल्का सहितको टोली गई जनप्रतिनिधिहरूको रोहबरमा खानतलासी गर्दा गाडीको अगाडी इन्जिनको भागबाट प्लास्टिकले बेरेको जेब्रा झोला भित्र गम्छाले बेरेको गरगहना र गाडी भित्रको भागबाट समेत चाँदी र नगद गरी करिब १५ लाखको सरसामान बरामद भएको जिल्ला प्रहरी कार्यालय सर्लाहीको सूचनामा उल्लेख गरिएको छ।