काठमाडौं - काठमाडौं महानगरपालिका–९ नागपोखरीस्थित एक घरमा छापा मारेर प्रहरीले ३२९.०५ ग्राम खैरो हेरोइनजस्तो देखिने पदार्थसहित चार जनालाई पक्राउ गरेको छ।
जिल्ला प्रहरी परिसर काठमाडौंका अनुसार सोमबार अपराह्न करिब ५ बजे लागूऔषध कारोबार भइरहेको सूचनाका आधारमा प्रहरी वृत्त मालीगाउँबाट खटिएको टोलीले घर, कोठा र बा ७ च ५१५० नम्बरको सवारीसाधनमा खानतलासी गर्दा उक्त पदार्थ बरामद गरेको हो।
प्रहरीले घटनास्थलबाट २२४ क्याप्सुल ट्रामाडोल, १०० ट्याब्लेट नाइट्राजेपाम, नगद रु. १ लाख ९८ हजार ३२५, तीन थान ल्यापटप, एक थान तराजु, एक थान सञ्चार सेट, एक थान एल्युमिनियम पेपर रोल र चार थान मोबाइलसमेत बरामद गरेको जनाएको छ।
पक्राउ पर्नेमा काठमाडौं महानगरपालिका–९ का ४३ वर्षीय प्रभात तिवारी, ललितपुर महानगरपालिका–४ का ५१ वर्षीय रोलिन श्रेष्ठ, काठमाडौं महानगरपालिका–१४ का ५१ वर्षीय भूपेन्द्र श्रेष्ठ र हाल काठमाडौं महानगरपालिका–१२ बस्दै आएका सर्लाही बरहथवा नगरपालिका–६ का ४० वर्षीय सुजन रायमाझी रहेका छन्।
प्रहरीले पक्राउ परेका चारै जनाविरुद्ध लागूऔषध सम्बन्धी कसुरमा थप अनुसन्धान अघि बढाएको जनाएको छ।
