अमेरिका -अमेरिकाले इरानका तीन आणविक साइटमा आक्रमण गरेको छ । अमेरिकी राष्ट्रपति डोनाल्ड ट्रम्पले शनिवार राति सामाजिक सञ्जालमार्फत अमेरिकाले इरानका तीन प्रमुख आणविक साइटहरू– फोर्डो, नातान्ज र इस्फहानमा सफल हवाई हमला गरेको जनाएका छन् ।
‘हामीले इरानका तीन आणविक साइटहरू– फोर्डो, नातान्ज र इस्फहानमा अत्यन्त सफल हमला सम्पन्न गरेका छौँ,’ ट्रम्पले सामाजिक सञ्जालमा लेखेका छन्, ‘सबै विमानहरू इरानी आकाशबाट बाहिर छन् । फोर्डो साइटमा पूर्ण क्षमताको बम खसालिएको छ। सबै विमानहरू सुरक्षित रूपमा फिर्ता हुँदै छन् ।’
उनले अमेरिकी सेनालाई बधाई दिँदै यो कार्य विश्वकै कुनै पनि सेनाले गर्न नसक्ने दाबी गरे। ‘अब शान्तिको समय हो !’ उनले थपे।
ह्वाइट हाउसले ट्रम्पले शनिवार राति १० बजे (अमेरिकी समय) राष्ट्रलाई सम्बोधन गर्ने जानकारी टेलिभिजन नेटवर्कहरूलाई दिएको छ । यो हमला इजरायलले विगत एक सातादेखि इरानको हवाई रक्षा प्रणाली, आक्रामक मिसाइल क्षमता र परमाणु संवर्द्धन सुविधाहरूलाई नष्ट गर्ने क्रममा गरेको हमलापछि भएको हो ।
अमेरिकी र इजरायली अधिकारीहरूका अनुसार अमेरिकी स्टेल्थ बमवर्षक बी २ र यसले बोक्न सक्ने ३०,००० पाउण्ड (१३,५०० किलोग्राम) वजनको बङ्कर बस्टर बमले फोर्डोको गहिरो भूमिगत साइट नष्ट गर्न सक्ने सबैभन्दा प्रभावकारी हतियार मानिएको थियो । रोयटर्सका अनुसार, शनिवार बिहान बी(२ बमवर्षकहरूलाई प्रशान्त महासागरको गुआम टापुमा सारिएको थियो र एक अमेरिकी अधिकारीले ती विमानहरू इरानका आणविक साइटहरूमा प्रयोग भएको पुष्टि गरे ।
इजरायलले यो हमला तेहरानलाई परमाणु हतियार विकासको सम्भावनाबाट रोक्ने उद्देश्यले गरेको जनाएको छ। तर, इरानले आफ्नो परमाणु कार्यक्रम शान्तिपूर्ण उद्देश्यका लागि भएको दाबी गर्दै आएको छ ।
यो हमला अमेरिका र ट्रम्पका लागि जोखिमपूर्ण निर्णय हो । इरानले अमेरिकाले इजरायली हमलामा संलग्न भएमा जवाफी कारबाही गर्ने चेतावनी दिएको छ । इरानी सर्वोच्च नेता आयतोल्लाह अली खामेनेईले बुधबार अमेरिकी हमलाले ‘अपूरणीय क्षति’ निम्त्याउने चेतावनी दिएका थिए। इरानी विदेश मन्त्रालयका प्रवक्ता इस्माइल बघाईले भने, ‘अमेरिकी हस्तक्षेपले क्षेत्रमा पूर्ण युद्ध निम्त्याउनेछ।
