रौतहट - रौतहटको कटहरिया नगरपालिका अन्तर्गत विवाह भएको ६ महिना नपुग्दै नवविवाहिता मुस्लिम महिलाको मृत्युको घटनासँग जोडिएका मुख्य आरोपी मृतकको श्रीमान माथि दुरुत्साहन मुद्दा दर्ता भएको छ।
घटनालाई दबाउन दोषीलाई कारबाही बाट बचाउन विचौलियाको चलखेल लाई चुनौती दिँदै ईलाका प्रहरी कार्यालय गरुडामा मुद्दा दर्ता भएको हो।
बिचौलियाले प्रहरी सँगै पीडित परिवार लाई अनेकन् दबाब र प्रभावमा पार्न चलखेल सुरु गरेका थिए तर एसपी नेत्र मणि गिरीको निर्देशन तथा ईलाका प्रहरी कार्यालय गरुडाका प्रमुख डिएस्पी राजन कार्कीको सुझबुझले दोषीलाई कारबाहीको दायरामा ल्याउन मुद्दा दायर गरिएको हो।
कटहरिया- ३ बड़ेरवा टोलमा घर भई हाल कटहरिया- ५ बजार क्षेत्रमै घर भएका अहमद राय भाटको छोरा अरमान राय भाट माथि २१ वर्षीया श्रीमती सानीया प्रविन लाई आत्महत्या गर्न बाध्य पारेको खुलेपछि ईलाका प्रहरी कार्यालय गरुडामा आत्महत्या दुरुत्साहन मुद्दा दायर गरिएको डिएसपी कार्कीले बताएका छन्।
विवाह भएदेखि नै मृतकका श्रीमान तथा घटनाका मुख्य आरोपी अरमानले दाइजोमा माग गरेको मोटरसाइकल, ऐसी, पैसा, लगायत सानो सानो कुरामा पनि श्रीमती सानियालाई मानसिक यातना दिने गरेको कारण घटना भएको अनुसन्धानबाट देखिएको डिएसपी कार्कीले बताएका छन्।
मुख्य आरोपीमाथि मुद्दा दायर गरिएको छ, घटनाको थप अनुसन्धान भइरहेको छ, अनुसन्धानमा अरू ककसको संलग्नता देखिन्छ त्यसै अनुसारको कारबाही प्रक्रिया बढाइने डिएसपी कार्कीले जानकारी दिएका छन्। घटना पछि मुख्य आरोपी मृतक सानियाका श्रीमान अरमान राय भाट फरार रहेको तथा खोजी कार्य भइरहेको डिएसपी कार्कीले बताएका छन्।
मृतकका बुबा भारत विहार मोतीहारी जिल्ला सुगौली नगरपालिका ११ राय टोला निमोई गाउँका महमद मोलाजीम रौशनका अनुसार दाइजोको कारण छोरी सानिया लाई दैनिक जसो कुटपिट गरी ज्वाइँ अरमान सहित सपरिवार मिलेर हत्या गरेको आरोप लगाएका थिए।
६ महिना अघि अरमानसँग बिहे गर्दा दाइजोमा फर्नीचर, वादिङ फ्रिज, कुलार पंखा, नाक, कान , घाँटीमा सुनको गहना सुनको औँठी, लगायत सम्पूर्ण सामान दिएको, बिदा गर्न पटक पटक भन्दा कहिले केटीएम मोटरसाईकल त कहिले १ लाख भारु माग गरेको, केही दिन अघि घरमा एसी जडान गर्न माग गरेको उनको भनाई छ। उनीहरूको माग पुरा गर्न नसकेको कारण विशेष गरी सम्धिनीसँग मिलेर रमानाले छोरी सानियाको घाँटी थिचेर हत्या गरी पंखामा झुण्याएर आत्महत्या देखाउन खोजेको मृतकका बाबु मोलाजीम रौशनले दाबी गरेका छन्।
के हो घटना ?
गत आइतवार दिउँसो आफ्नै घरको कोठामा साडीको पासो बनाई सिलिङ फ्यानमा झुण्डिएको अवस्थामा सानियाको शव भेटिएको थियो। सानियाको सासुससुरा लगायतकाले उनी पासो लगाएर आत्महत्या गरेको बताइरहेका छन् भने माइती पक्षले छोरीको हत्या गरेर शव लाई झुण्ड्याएर आत्महत्या देखाउन खोजेको भन्दै आएका छन्। घटनाको सत्य तथ्य छानबिन गरी दोषीलाई कारबाही गर्नुपर्ने माग गरेका थिए । उक्त मृत्युको घटनाको नेपाल प्रहरीका संगठन प्रमुख आईजिपी दीपक थापाले विशेष चासो राखेका थिए।
