काठमाडौं - प्रहरीले अवैध लागूऔषध सहित देशका विभिन्न स्थानबाट १३ जनालाई पक्राउ गरेको छ । प्रहरी प्रधान कार्यालयले उनीहरूलाई पक्राउ गरेको जानकारी दियो ।

प्रहरीका अनुसार चन्द्रागिरी नगरपालिका-२ नागढुङ्गाबाट अवैध लागूऔषध खैरो हेरोइन जस्तो देखिने पदार्थ १ ग्राम ४ सय मिलिग्राम सहित गोरखा, पालुङटार नगरपालिका-८ बस्ने ३१ वर्षीय बिशाल तामाङलाई शुक्रबार बेलुकी प्रहरीले पक्राउ गरेको हो । प्रहरी प्रभाग नागढुङ्गाबाट खटिएको प्रहरीले धरानबाट काठमाडौंतर्फ आउँदै गरेको बा.प्र.००३-००१ ख ३३६६ नम्बरको बसमा सवार उनलाई उक्त पदार्थ सहित पक्राउ गरेको हो ।

यस्तै दाङ, घोराही उपमहानगरपालिका-१३ मनकामना टोलस्थित सडकबाट अवैध लागूऔषध ब्राउनसुगर जस्तो देखिने पदार्थ १ ग्राम र नगद ४ हजार ७ सय रूपैयाँ सहित २ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरूमा सोही उपमहानगरपालिका-१३ सेवार बस्ने २६ वर्षीय निशान बुढाथोकी र सोही उपमहानगरपालिका-१४ बस्ने रोल्पा त्रिवेणी गाउँपालिका-२ नुवागाउँ घर भएका २२ वर्षीय सन्तोष बुढा मगर रहेका छन् । वडा प्रहरी कार्यालय घोराहीबाट खटिएको प्रहरीले  रा.६ प ३५६६ नम्बरको स्कुटरमा सवार उनीहरूलाई उक्त पदार्थ सहित पक्राउ गरेको हो ।

सुनसरी, इटहरी उपमहानगरपालिका-१ मुसहरिया टोल बस्ने ४५ वर्षीया पुनम राईलाई अवैध लागूऔषध गाँजा ३ किलो २ सय ग्राम सहित शुक्रबार दिउँसो प्रहरीले पक्राउ गरेको छ । प्रहरी चौकी तरहराबाट खटिएको प्रहरीले उनको घर तलासी गर्दा उक्त गाँजा फेला पारी पक्राउ गरेको हो ।

कैलाली, धनगढी उपमहानगरपालिका-१३ झलारीगाउँबाट अवैध लागूऔषध ब्राउनसुगर जस्तो देखिने पदार्थ ५ सय २० मिलिग्राम सहित ३ जनालाई शुक्रबार साँझ प्रहरीले पक्राउ गरेको छ । पक्राउ पर्नेहरूमा सोही उपमहानगरपालिका-१३ बस्ने २३ वर्षीय भुवन राना, उनको श्रीमती २३ वर्षीया कल्पना चौधरी र सोही उपमहानगरपालिका-११ बस्ने २५ वर्षीय जिवन चौधरी रहेका छन् । प्रहरी चौकी कैलालीगाउँबाट खटिएको प्रहरीले उनीहरूलाई उक्त पदार्थ सहित पक्राउ गरेको हो ।

बर्दिया, बढैयाताल गाउँपालिका-२ फुटाहबाट अवैध लागूऔषध ब्राउनसुगर जस्तो देखिने पदार्थ १ सय ६० मिलिग्राम सहित सोही गाउँपालिका-३ सिमरा बस्ने २८ वर्षीय बिनोद कुर्मिलाई शुक्रबार राति प्रहरीले पक्राउ गरेको छ । प्रहरी चौकी जमुनीबाट खटिएको प्रहरीले भारतबाट नेपालतर्फ पैदल आउँदै गरेका उनलाई उक्त पदार्थ सहित पक्राउ गरेको हो ।

बाँके, कोहलपुर नगरपालिका-१५ चन्नहवा गाउँबाट अवैध लागूऔषध ब्राउनसुगर जस्तो देखिने पदार्थ १ ग्राम र नगद ५ हजार ३ सय ५० रूपैयाँ सहित सोही ठाउँ बस्ने १८ वर्षीय किशोरलाई शुक्रबार साँझ प्रहरीले पक्राउ गरेको छ । इलाका प्रहरी कार्यालय कोहलपुर समेतबाट खटिएको प्रहरीले उनलाई उक्त पदार्थ सहित पक्राउ गरेको हो । 

मोरङ, लेटाङ नगरपालिका-५ बाट अवैध लागूऔषध खैरो हेरोइन जस्तो देखिने पदार्थ २ ग्राम सहित २ जनालाई शुक्रबार राति प्रहरीले पक्राउ गरेको छ । पक्राउ पर्नेहरूमा सोही नगरपालिका-५ बस्ने ३१ वर्षीय प्रविन राई र उर्लाबारी नगरपालिका-२ बस्ने २२ वर्षीय सन्दिप धिमाल रहेका छन् । इलाका प्रहरी कार्यालय लेटाङबाट खटिएको प्रहरीले ना.३ प २६८७ नम्बरको मोटरसाइकलमा सवार उनीहरूलाई उक्त पदार्थ सहित पक्राउ गरेको हो ।

यसैगरी मोरङ, विराटनगर महानगरपालिका-१६ दरैयाबाट अवैध लागूऔषध खैरो हेरोइन जस्तो देखिने पदार्थ ५ सय मिलिग्राम सहित २ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरूमा तेह्रथुम घर भएका ३६ वर्षीय संजिव ढकाल र भारत घर भएका २५ वर्षीय अब्दुल इकराम रहेका छन् । इलाका प्रहरी कार्यालय रानीबाट खटिएको प्रहरीले भारतबाट नेपालतर्फ आउँदै गरेको को.१७ प ४३८४ नम्बरको मोटरसाइकलमा सवार उनीहरूलाई उक्त पदार्थ सहित पक्राउ गरेको हो । 

प्रहरीका अनुसार पक्राउ परेकाहरूको सम्बन्धमा आवश्यक अनुसन्धान गर्ने कार्य भइरहेको छ ।