काठमाडौं - नेपाल नागरिक उड्डयन प्राधिकरण (क्यान)ले नेपालमा सञ्चालनमा रहेका प्याराग्लाइडिङ कम्पनीहरूलाई असोज मसान्तसम्ममा आफ्नो स्वामित्वमा रहेका सम्पूर्ण प्याराग्लाइडर अनिवार्य दर्ता गराउन निर्देशन दिएको छ। प्राधिकरणले आगामी आर्थिक वर्ष २०८२/८३ सुरु भएदेखि तीन महिनाभित्र  प्याराग्लाइडर  दर्ता गराउन समय सीमा तोकेको छ।

क्यानको फ्लाइट सेफ्टी स्ट्याण्डर्ड्स विभागले गोरखापत्रमा सूचना निकालेर मनोरञ्जनात्मक उड्डयन नियमावली, २०६९ तथा रिक्रियशनल एभिएसन अपरेटर सर्टिफिकेट रिक्वायरमेन्ट्स, २०२५ बमोजिम यो व्यवस्था लागू गरिएको जनाएको छ।

संस्कृति पर्यटन तथा नागरिक उड्डयन मन्त्रालयबाट सञ्चालन इजाजत र क्यानबाट मनोरञ्जनात्मक उड्डयन सञ्चालन प्रमाणपत्र तथा उड्डयन प्रशिक्षण संस्था सञ्चालन प्रमाणपत्र प्राप्त गरेका कम्पनीहरूले आफ्नो मातहतमा रहेका सम्पूर्ण सोलो र ट्यान्डेम प्याराग्लाइडर क्यानको फ्लाइट सेफ्टी स्ट्याण्डर्ड्स विभागमा दर्ता गराइ  सोही बमोजिमको सञ्चालन प्रमाण पत्र अद्यावधिक गर्न निर्देशन दिएको छ । 

प्राधिकरणले तोकिएको समयमा दर्ता नगरिएका प्याराग्लाइडरलाई गैर कानुनी घोषणा गरी प्रचलित ऐन तथा नियमावली बमोजिम आवश्यक कारबाही गरिनेसमेत  बताएको छ ।