इजरायल - इजरायली सेनाले पछिल्लो समय ‘सुरक्षित क्षेत्र’ भनिएको अल–मावासीमा आक्रमण गरेको छ । उक्त आक्रमणमा कम्तीमा ३६ जनाको मृत्यु भएको अन्तर्राष्ट्रिय समाचार संस्था अलजजिराले जनाएको छ । इजरायलले गाजामा थप आक्रमणको तयारी गरिरहेका बेला यो आक्रमण भएको हो । यसैबीच, इराकको राजधानी बग्दादमा भेला भएका अरब देशका नेताहरूले गाजामाथिको युद्ध तत्काल अन्त्य गर्न माग गरेका छन् ।
गाजाको स्वास्थ्य मन्त्रालयका अनुसार इजरायली आक्रमणमा अहिलेसम्म ५३ हजार २सय७२ जना प्यालेस्टाइनीको मृत्यु भएको छ । एक लाख २० हजार ६ सय७३ जना घाइते भएका छन् ।
यता, हमासले सन् २०२३ को अक्टोबर ७ मा इजरायलमा गरेको आक्रमणमा एक हजार १३९ जनाको ज्यान गएको थियो भने २०० भन्दा बढी व्यक्तिहरूलाई अपहरण गरिएको इजरायलको दाबी छ ।
यता कतारमा हमाससँग युद्धविरामको लागि वार्ता चलिरहेको बेलामा यो आक्रमण भएको हो । हमासले युद्धविरामको लागि शनिबार मत्रै इजरायल समक्ष नयाँ प्रस्ताव गरेको थियो ।
