रौतहट - रौतहटका सिडिओ  दिनेश सागर भुसालको सरुवा भएको छ। गृह मन्त्रालयले भुसाललाई सहसचिवका रूपमा गृह मन्त्रालय, सिंहदरबारमा सरुवा गरेको हो। भुसालको स्थानमा पर्वतका सिडियो लक्ष्मी प्रसाद पौडेललाई रौतहटको  जिम्मेवारी दिइएको छ।

गृह मन्त्रालयले भदौ १८ गते गरेको निर्णयअनुसार विभिन्न जिल्ला प्रशासन कार्यालय तथा मन्त्रालयमा कार्यरत २३ जना सहसचिव तथा उपसचिव तहका कर्मचारीको सरुवा तथा पदस्थापन गरेको हो।

छोटो कार्यकालमै छाडे प्रभाव
रौतहटमा सिडिओका रूपमा भुसालको कार्यकाल लामो नभए पनि प्रशासनिक सक्रियता, सुरक्षा समन्वय र सामाजिक सद्भाव कायम गर्ने प्रयासका कारण उनको कार्यकाल चर्चामा रह्यो।

उनले २०८२ साल फागुन २१ गते सम्पन्न प्रतिनिधिसभा निर्वाचनलाई शान्तिपूर्ण रूपमा सम्पन्न गराउन प्रशासनिक संयन्त्रको नेतृत्वदायी भूमिका निर्वाह गरेका थिए। निर्वाचनका क्रममा सुरक्षा निकाय, स्थानीय तह, राजनीतिक दल तथा अन्य सरोकारवालाबीच समन्वय कायम गर्न उनले विशेष जोड दिएका थिए।

रौतहटमा समय–समयमा देखिने साम्प्रदायिक तथा सामाजिक विवादका क्रममा पनि भुसालले संवाद र समन्वयलाई प्राथमिकता दिएको देखियो। संवेदनशील परिस्थितिमा प्रशासनिक निर्णयसँगै सामाजिक संवेदनशीलतालाई समेत ध्यान दिएर अघि बढ्नु उनको कार्यशैलीको सकारात्मक पक्षका रूपमा लिइएको छ।

जिल्लामा शान्ति–सुरक्षा कायम गर्ने मात्र नभई स्थानीय तह, नागरिक समाज र सुरक्षा निकायबीच समन्वय बढाउने तथा समस्या उत्पन्न हुनुअघि नै सम्बन्धित पक्षसँग छलफल गर्ने उनको प्रयास देखिएको थियो।

विपद् व्यवस्थापन, सुरक्षा समन्वय र प्रशासनिक सेवा प्रवाहमा समेत उनले सक्रियता देखाएका थिए। रौतहटजस्तो सामाजिक तथा धार्मिक विविधता भएको जिल्लामा प्रशासनका लागि शान्ति–सुरक्षा र सामाजिक सद्भाव कायम राख्नु आफैंमा चुनौतीपूर्ण मानिन्छ।

यही चुनौतीबीच विवादित विषयमा संवाद र समन्वयलाई प्राथमिकता दिनु भुसालको कार्यकालको उल्लेखनीय पक्षका रूपमा लिन सकिन्छ।

नयाँ सिडिओ पौडेलसामु चुनौती
अब रौतहटको प्रशासनिक नेतृत्व सम्हाल्न आउन लागेका लक्ष्मी प्रसाद पौडेलसामु भने जिल्लाको शान्ति–सुरक्षा, सुशासन, सेवा प्रवाह र प्रशासनिक व्यवस्थापनलाई प्रभावकारी बनाउने चुनौती रहनेछ।

विशेषगरी सामाजिक तथा धार्मिक संवेदनशीलता रहेको रौतहटमा सम्भावित विवादलाई समयमै पहिचान गरी राजनीतिक दल, स्थानीय तह, नागरिक समाज र सुरक्षा निकायसँग प्रभावकारी समन्वय गर्नु नयाँ सिडिओ पौडेलका लागि महत्वपूर्ण जिम्मेवारी हुनेछ।

भुसालले अघि बढाएको समन्वय, संवाद र सामाजिक सद्भावको अभ्यासलाई निरन्तरता दिँदै प्रशासनिक सेवा प्रवाहमा थप सुधार ल्याउनु पौडेलका लागि प्रारम्भिक प्राथमिकताका विषय बन्ने देखिन्छ।उता, गृह मन्त्रालयमा सहसचिवका रूपमा जिम्मेवारी सम्हाल्न लागेका भुसालले रौतहटमा प्राप्त गरेको प्रशासनिक अनुभवलाई अब मन्त्रालयस्तरको जिम्मेवारीमा कसरी उपयोग गर्छन् भन्ने विषय पनि चासोको रूपमा हेरिएको छ।