काठमाडौं - नेपाल प्रहरीले संगठनभित्र ठूलो स्तरको प्रशासनिक पुनर्संरचना गर्दै ५०९ जना प्रहरी निरीक्षक इन्स्पेक्टरको सरुवा तथा काज व्यवस्थापन गरेको छ।
प्रहरी प्रधान कार्यालयको मानवस्रोत विकास विभागले जारी गरेको निर्णयअनुसार देशभरका विभिन्न इकाइमा कार्यरत इन्स्पेक्टरहरूको कार्यक्षेत्र फेरबदल गरिएको हो।
सरुवा सूचीमा जिल्ला प्रहरी कार्यालय, ट्राफिक प्रहरी इकाइ, प्रहरी प्रभाग तथा केन्द्रीय विभागमा कार्यरत अधिकारीहरू समेटिएका छन्।
नयाँ जिम्मेवारीअनुसार सम्बन्धित इन्स्पेक्टरहरूले आगामी असार महिनादेखि तलबभत्ता समेत नयाँ दरबन्दीबाट बुझ्ने व्यवस्था गरिएको प्रहरीले जनाएको छ।
प्रहरी संगठनभित्र जनशक्तिको प्रभावकारी व्यवस्थापन, कार्यसम्पादनमा सुधार तथा आवश्यकताअनुसार नेतृत्वको पुनःवितरण गर्ने उद्देश्यले सरुवा प्रक्रिया अघि बढाइएको बताइएको छ।
यस निर्णयमार्फत स्थानीय तहदेखि केन्द्रीय संरचनासम्म जिम्मेवारीको पुर्नसन्तुलन गरिएको छ।
प्रहरी प्रधान कार्यालयका अनुसार संगठनात्मक आवश्यकता, कार्यसम्पादन मूल्यांकन र सेवा प्रवाहलाई थप प्रभावकारी बनाउने लक्ष्यका आधारमा सरुवा तथा काज हेरफेर गरिएको हो।
