रौतहट - रौतहट प्रहरीले रुबी साहको हत्या प्रकरणमा एक जनालाई पक्राउ गरेको छ । गौर नगरपालिका ९ मुडवलवा नजिक सुटकेसभित्र मृत अवस्थामा भेटिएकी  साहको हत्यामा संलग्न रहेको आरोपमा प्रहरीले  लक्ष्मण पासवानलाई आज बिहान घाइते अवस्थामा पक्राउ गरेको हो। माधव नारायण नगरपालिका–६ स्थित नहर अगाडि बिहान करिब ८ बजे पासवानले आफ्नै शरीरमा पेट्रोल हालेर आगो लगाएको अवस्थामा प्रहरीले पक्राउ गरेको हो । 

जिल्ला प्रहरी कार्यालय रौतहटका प्रवक्ता प्रहरी नायब उपरीक्षक (डीएसपी) राजु कार्कीका अनुसार अनुसार  आत्महत्याको प्रयास गरेको बुझिएपछि उनलाई नियन्त्रणमा लिई उपचारका लागि गरुडास्थित बेटर अस्पतालमा भर्ना गरिएको छ ।

यसअघि प्रहरीले रुबीको शवलाई ई–रिक्सामा राखी उक्त सडक खण्डसम्म पुर्‍याएको आरोपमा रिक्सा चालक लक्ष्मण महरालाई पनि पक्राउ गरिसकेको छ ।

गत शनिवार राति रुबी साहको शव सुटकेसभित्र फेला परेपछि यस प्रकरणमा पासवानको नै मुख्य संलग्नताको प्रहरी अनुसन्धानमा खुलेको थियो ।

पक्राउ परेका पासवानले आफ्ना हातमा रुबिको नामको ट्याटु बनाएको र छातीमा समेत रुबिको फोटो सहितको ट्याटु बनाएको पाइएको छ।  यस विषयमा थप अनुसन्धान भइरहेको  जिल्ला प्रहरी कार्यालय रौतहटले जनाएको छ ।