काठमाडौं - सोमबार राती तिब्बतमा आएको भारी वर्षाका कारण भोटेकोशी नदीमा आएको बाढीले मितेरी खोलाको पूल बगाउँदा चीनसँगको व्यापार सम्पर्क पुर्ण रूपमा विच्छेद भएको छ ।

रसुवा जिल्लाका सहायक जिल्ला अधिकारी द्रुव प्रसाद अधिकारीका अनुसार रसुवा गढीबाट चीन जोडिने नाकामा रहेको मितेरी पुल बगाएकोले चीनसँगको व्यापार सम्बन्ध पुर्ण रूपमा टुटेको हो । उनका अनुसार बाढीको क्षति हेर्दा लामो समयसम्म नै व्यापार सम्पर्क टुट्न सक्ने देखिएको छ ।

रसुवागढी भन्सार कार्यालयको यार्डमा रहेका केही विद्युतीय गाडी र मालबाहक ट्रकहरू बाढीले बगाएको बताउँदै उनले हालसम्म के कति आर्थिक क्षति भयो भन्ने यकिन विवरण आउन बाँकी रहेको बताएका छन् ।

नेपाल हिमालय सीमापार वाणिज्य संघका महासचिव रामचन्द्र पराजुलीले भने बाढीका कारण भन्सार यार्डमा स्टक गरेर राखिएको इभी गाडीहरू बगाएको र अर्बौको रुपैयाँ बराबरको क्षति भएको अनुमान रहेको बताए ।

रसुवा जिल्लाको टिमुरेमा धेरै जनधनको क्षति भएको र राहत र उद्धारका लागि सम्बन्धित मन्त्रालयमा पुगेर समन्वय गर्ने तयारी भएको उनले जानकारी दिए ।

१८ जना सम्पर्क बिहिन र ९ जनाको उद्धार
रसुवा जिल्ला प्रशासनको जानकारी अनुसार बाढीका कारण हाल सम्म १८ जना सम्पर्कविहीन र ९ जनाको सकुशल उद्धार गरिएको छ । सहायक जिल्ला अधिकारीका अनुसार हाल सम्मको विवरण अनुसार तीनजना प्रहरी, रसुवा भन्सारको जाँचपास यार्डमा काम गर्ने कामदार ९ जना र ६ जना चिनियाँ नागरिक सहित १८ जना हाल सम्म सम्पर्क विहीन छन् । त्यसैगरी, बाढीमा फसेका ९ जनाको सकुशल उद्धार गरिएको छ ।

‘बाढीका कारण रसुवागढी जलविद्युत आयोजनाको बाँधमा आंशीक क्षति पुगेको छ । अन्य जलविद्युत आयोजनामा पनि सर्तकता अपनाउन आग्रह गरिएको छ । केही आयोजनाको उत्पादन रोकिएको अवस्था छ,‘ अधिकारीले भने । ‘नेपाल प्रहरी, शस्त्र प्रहरी बल र नेपाली सेना सहित १२० जनाको सहयोगमा उद्धार कार्य जारी छ । प्रमुख जिल्ला अधिकारीको नेतृत्वमा सुरक्षा समितिका सबै निकायहरू घटनास्थलमा निरीक्षण र उद्धार कार्यवजारी छ ।’