काठमाडौं - नेपाल–चीन सीमा क्षेत्रमा विनाशकारी बाढी आएको एक महिना बितिसक्दा पनि ५४ जना युक्रेनी नागरिक बेपत्ता रहेको र उनीहरूका परिवार आफन्तको अवस्थाबारे जानकारीको प्रतीक्षामा रहेका छन्।

गत अगस्ट २६ मा नेपाल–चीन सीमा क्षेत्रमा आएको बाढीपछि कैलाश पर्वतको आध्यात्मिक यात्राबाट फर्किरहेका अधिकांश युक्रेनी नागरिकसहित ५६ जनाको समूह बेपत्ता भएको थियो।

३६ वर्षीया ओलेना कालिनिचेन्को पनि उक्त समूहमा थिइन् । बाढी आउनुभन्दा करिब १५ मिनेटअघि उनी चीनको सीमा चौकीबाट बाहिरिँदै गर्दा अन्तिमपटक देखिएकी थिइन् । चीनबाट किनेको ‘क्रिसान्थेमम’ चिया घर फर्किएपछि साथीसँग पिउने योजना बनाएकी कालिनिचेन्कोको त्यसपछि कुनै खबर छैन।

उनका साथी ओलेस भिसिचले एक महिनादेखि कालिनिचेन्कोको खबरको प्रतीक्षा गरिरहेका छन् । उनले कालिनिचेन्कोले घर फर्किएपछि चिनियाँ फूलबाट बनेको चिया सँगै पिउने बताएको स्मरण गरेका छन् ।

नेपाल सरकारका अनुसार बाढीमा एक हजार ४०० भन्दा बढी मानिसको मृत्यु भएको छ भने छ हजारभन्दा बढी बेपत्ता छन्। तीमध्ये अधिकांश नेपाली भूभागतर्फका छन्। नेपालले ५४ युक्रेनीसहित ६३६ विदेशी नागरिक अझै बेपत्ता रहेको जनाएको छ। चीनले आफ्नो भूभागमा २६१ विदेशी नागरिक बेपत्ता भएको र तीमध्ये एक जना युक्रेनी रहेको जनाएको छ।

नेपालले हालसम्म एक हजार ४५१ शव फेला पारेको जनाएको छ। तीमध्ये ११२ शव मात्र परिवारलाई हस्तान्तरण गरिएको छ। सरकारले दुई हजार ३५ जना आफन्तबाट डीएनए नमुना सङ्कलन गरेको भए पनि कति शवको पहिचान भइसकेको छ भन्ने विवरण सार्वजनिक गरेको छैन।

बाढीका कारण नेपालतर्फको अध्यागमन कार्यालय र अभिलेख नष्ट भएकाले चीनबाट निस्किएका केही व्यक्तिले नेपाल प्रवेश गरे वा नगरेको यकिन गर्न कठिन भएको छ। केही परिवारलाई चिनियाँ अधिकारीहरूले उनीहरूका आफन्त बाढी आउनुअघि नै चिनियाँ भूभागबाट बाहिरिसकेको जानकारी दिएका छन्।

आध्यात्मिक शिक्षिका इरिना ब्लोन्स्कायाको नेतृत्वमा रहेको उक्त समूह तिब्बतबाट बसमार्फत काठमाडौं आउने र त्यसपछि आ–आफ्नो देशतर्फ जाने योजनामा थियो। तर पहाडबाट आएको बरफ, चट्टान, हिलो र पानीसहितको तीव्र भेलले कैलाश जाने तीर्थयात्रीले प्रयोग गर्ने केरुङ बन्दरगाह क्षेत्रमा ठूलो क्षति पुर्‍याएको थियो।

बेपत्ता व्यक्तिका परिवारले खोजी तथा पहिचान प्रक्रिया निकै सुस्त भएको गुनासो गरेका छन्। नर्वेमा रहेकी भ्लादिस्लाभा होर्लोभाले आफ्नी आमाको खोजीका लागि युक्रेनी दूतावास, नर्वेली प्रहरी र रेडक्रसलगायत निकायसँग सम्पर्क गरिरहनुभएको छ। उहाँले प्रहरीलाई डीएनए नमुनासमेत उपलब्ध गराएका छन् । 

विपद्को एक महिना बितिसक्दा पनि केही परिवारले आफन्त जीवितै भेटिने आशा छाडेका छैनन्। कालिनिचेन्कोका साथी भिसिचले पनि सकारात्मक रहने प्रयास गरिरहेको बताएका छन् ।