काठमाडौं - रुसले युक्रेनमाथि नयाँ आक्रमणको लहर सुरु गरेकै दिन युद्ध अन्त्यका प्रयासस्वरूप जेनेभामा अमेरिका र युक्रेनबीच नयाँ चरणको वार्ता सुरु हुने भएको छ। युद्धभूमिमा हिंसा नरोकिएको अवस्थामा कूटनीतिक पहल अघि बढाउन यी बैठकहरू आयोजना गरिएको हो।

यस चरणको वार्तामा युक्रेनका प्रमुख वार्ताकार रुस्तम उमरोभ सहभागी हुनेछन् भने अमेरिकी पक्षबाट राष्ट्रपति डोनाल्ड ट्रम्पका दूत स्टिभ विटकफ र जारेड कुसनर सहभागी हुने जनाइएको छ। मार्चको सुरुमा रुससमेत सहभागी हुने त्रिपक्षीय बैठकको अपेक्षा गरिएको छ।

रुसी समाचार एजेन्सी तासका अनुसार क्रेमलिनका आर्थिक मामिलासम्बन्धी दूत किरिल दिमित्रीभ पनि अमेरिकी प्रतिनिधिसँग आर्थिक विषयमा छलफल गर्न जेनेभा पुग्ने तयारीमा छन्।

ट्रम्प प्रशासनको पहलमा अघि बढाइएको यी वार्ताहरूले दोस्रो विश्वयुद्धपछि युरोपमा भएको सबैभन्दा घातक द्वन्द्व अन्त्य गर्ने प्रयास गरिरहेको भए पनि अहिलेसम्म ठोस उपलब्धि हासिल गर्न सकेका छैनन्। सन् २०२२ मा सुरु भएको रुसको पूर्ण आक्रमणपछि जारी युद्धमा लाखौँ मानिसको ज्यान गएको छ र विशेष गरी पूर्वी तथा दक्षिणी युक्रेनमा व्यापक विनाश भएको छ।

वार्ताको केही घण्टा अघिमात्रै रुसी सेनाले युक्रेनका विभिन्न क्षेत्रमा आक्रमण तीव्र बनाएको थियो। राजधानी किएभमा विस्फोटका आवाज सुनिएको अन्तर्राष्ट्रिय सञ्चारमाध्यमहरूले जनाएका छन्। युक्रेनी वायु सेनाका अनुसार रुसले ड्रोन र ब्यालेस्टिक क्षेप्यास्त्र प्रयोग गरी आक्रमण गरिरहेको छ। खार्किव, जापोरिझिया र ड्निप्रोपेट्रोभस्क क्षेत्रमा पनि आक्रमण भएको छ भने खार्किवमा मात्र सात जना घाइते भएको अधिकारीहरूले बताएका छन्।

वार्ताको पूर्वसन्ध्यामा युक्रेनी राष्ट्रपति भोलोदिमर जेलेन्स्कीले अमेरिकी राष्ट्रपति ट्रम्पसँग करिब ३० मिनेट टेलिफोन वार्ता गरेका थिए। उक्त संवादमा विटकफ र कुसनर पनि सहभागी थिए। जेलेन्स्कीले सामाजिक सञ्जालमार्फत जेनेभामा हुने बैठकका एजेन्डा तथा मार्चमा सम्भावित त्रिपक्षीय वार्ताको तयारीबारे छलफल भएको जानकारी दिएका छन्।

युक्रेनी पक्षले दीर्घकालीन सुरक्षा प्रत्याभूति बिना कुनै पनि सम्झौता स्वीकार नगर्ने अडान दोहोर्‍याएको छ। वार्ताको प्रमुख अवरोध पूर्वी युक्रेनको औद्योगिक क्षेत्र डोनबासको भविष्यलाई लिएर रहेको बताइएको छ। रुसले डोनेट्स्क क्षेत्रमा पूर्ण नियन्त्रणको माग गर्दै आएको छ भने किएभले उक्त माग अस्वीकार गर्दै स्पष्ट सुरक्षा संयन्त्र आवश्यक रहेको जनाएको छ।