काठमाडौं- नेपाली कांग्रेसको केन्द्रीय कार्यसमितिको बैठक आज बस्दै छ । चर्को विवादका कारण पटक-पटक सर्दै आएको केन्द्रीय कार्यसमितिको बैठक आज बस्न लागेको हो । 

कांग्रेसको १५औँ महाधिवेशन आगामी पुस २६ देखि २९ मा गर्ने र सोही बमोजिम आजको बैठकमा कार्यतालिका प्रस्तुत गर्ने सहमति भएसँगै बैठक बस्ने भएको हो । असोज २८ देखि महाधिवेशनको विवादमा अल्झिएको कांग्रेसले सभापति शेरबहादुर देउवाको निर्देशन बमोजिम निकास निकालेको हो ।

आज बस्ने केन्द्रीय समिति बैठकमा कार्यतालिकासम्बन्धी प्रस्ताव कार्यवाहक सभापति पूर्णबहादुर खड्काले पेस गर्नेछन् । आइतबार कार्यवाहक सभापति खड्काले महामन्त्री विश्वप्रकाश शर्मा, नेता रमेश लेखक र प्रचार विभाग प्रमुख मीन विश्वकर्मासहितको छलफलबाट पार्टी सभापतिको आग्रह बमोजिम कार्यतालिका प्रस्ताव तयार पारेका छन् । 

यसअघि महामन्त्री र सहमहामन्त्रीका अलगअलग प्रस्ताव पेस भएकाले सहमतिको प्रस्ताव कार्यवाहक सभापति खड्काले नै पेस गर्न लागेको स्रोतले जानकारी दिएको छ । कार्यवाहक सभापतिको प्रस्ताव छलफलका लागि नभएर निर्णयार्थ पेस हुनेछ । 

यता‚ बैशाखमा नियमित महाधिवेशन माग्दै आएको संस्थापन समूहले यो कार्यतालिका फेल गराउने चेतावनी दिइसकेको छ ।