काठमाडौं - नेपाली कांग्रेसका सभापति शेरबहादुर देउवा निवासमा आज पनि बैठक बस्दै छ ।

देउवा निवासमा दिउँसो १ बजे पश्चात् कार्यवाहक सभापति पूर्णबहादुर खड्का तथा दुई महामन्त्रीहरू गगन थापा र विश्वप्रकाश शर्मा सहितको बैठक बस्न लागेको हो । बैठकमा नेता शेखर कोइराला‚ विमलेन्द्र निधि‚ कृष्ण सिटौला तथा रमेश लेखक पनि सहभागि हुने छन् ।

पार्टीको १५ औँ महाधिवेशनको मिति र कार्य तालिकामा सहमति जुटाउन बैठक बस्न लागेको हो । बिहीबारदेखि निरन्तर यिनीहरूबिच देउवा निवासमै संवाद भए पनि हालसम्म निचोड भने आउन सकेको छैन ।

स्रोतका अनुसार सभापति शेरबहादुर देउवा कुनै पनि हालतमा विशेष महाधिवेशन गर्न तयार छैनन् । उनी पुस बाट सुरु गर्ने गरी नियमित महाधिवेशन भने गर्न तयार रहेका छन् । देउवाले विशेष महाधिवेशनका लागि भएको हस्ताक्षर भने फिर्ता लिनुपर्ने अडान राखिरहेका छन् । तर‚ उनकै सम समूहका नेता कृष्ण सिटौला र विमलेन्द्र निधि भने कुनै पनि हालतमा नियमित महाधिवेशन पनि बैशाखमा गर्नुपर्ने अडानमा छन् ।

तर‚ इतरमा देखिएको समूह भने पुसमा महाधिवेशन गर्ने ग्यारेन्टी खोजी रहेका छन् । उनीहरूले विशेष महाधिवेशनको हस्ताक्षर फिर्ता नलिने भन्दै कुनै पनि हालतमा पुस मसान्तभित्र भए नियमित नभए विशेष महाधिवेशन गरिछाड्ने अडान राखेका छन् ।

यही विषयमा संवाद नमिल्दा कांग्रेसको केन्द्रीय समिति बैठक सर्दै आएको छ । मंसिर ११ का लागि बोलाइएको केन्द्रीय समिति बैठक पटक पटक सार्दै भोली अर्थात् सोमबार मंसिर १५ गते बस्ने गरी नयाँ मिति तोकिएको छ ।