काठमाडौं - जेनजी आन्दोलनका कारण घाइते भएकाहरू देशका विभिन्न अस्पतालमा उपचार गराइरहेका छन् । गत भदौ २३ गते काठमाडौं बानेश्वरमा कम्मरमा गोली लागेर राष्ट्रिय ट्रमा सेन्टरमा उपचार गराइरहेका महोत्तरीका २५ वर्षीय राकेश महतोको भने दुई वटै खुट्टा चल्न नसक्ने अवस्थामा पुगेको छ ।

राकेशका दाजु राजेशका अनुसार गोली लागेका भाइको दुई वटै खुट्टा प्यारालाइसिस हुने सम्भावना बढेको जानकारी दिए । ‘भाइलाई काठमाडौंमा राखेर पढाइरहेका थियौँ । सरकारी जागिरका लागि लोकसेवाको तयारी गरिरहेको थियो । उसको कम्मरमा गोली लागेकाले खुट्टै नचल्ने अवस्था पुगेको डाक्टरहरूले जानकारी दिनुभएको छ । घरमा आमा पनि बिरामी हुनुहुन्छ, कमाइ गर्ने म एक्लो हुँ । अब भाइ र आमालाई उपचार एवं पालनपोषणमा समस्या पर्न थालेको छ,’ उनले भने ।

राजेशका अनुसार भाइको अवस्था सामान्य छ तर खुट्टा चलाउन गाह्रो भइरहेको छ, डाक्टरहरूले अब उपचार सम्भव नभएको बताउनुभएको उनले जानकारी दिए । राजेश आक्रोशित हुँदै भन्छन्,‘गोली हान्न आदेश दिनेलाई कारबाही हुनुपर्छ । जीवन गुमाएका परिवार र घाइते भएर आजीवन अशक्त भएकाहरूलाई सरकारले जागिर दिनुपर्छ ।’