रौतहट - सर्लाही प्रहरीले लागु औषध २५ किलो गाँजासहित एक युवकलाई पक्राउ गरेको छ । लाल बन्दी नगरपालिका–८, खतिवडा चोकबाट प्रहरीले २० वर्षीय सन्ते ब्लोनलाई पक्राउ गरेको हो ।

लाल बन्दी नगरपालिका–१४, नारायणखोला कामीटार बस्ने ब्लोनसहित मोटरसाइकल र झोला नियन्त्रणमा लिएको इलाका प्रहरी कार्यालय लालबन्दीका प्रहरी निरीक्षक वीरेन्द्रसिंह जोहारीले बताए

उनका अनुसार नारायण खोलाबाट पत्थरकोट हुँदै लालबन्दीतर्फ आउँदै गरेको बागमती प्रदेश ०२–०४२ प ४०५३ नम्बरको मोटरसाइकललाई रोक्न खोज्दा मोटरसाइकलमा सवार दुई युवक भाग्न खोजेपछि प्रहरीले पछ्याउँदै गएको हो ।

मोटरसाइकल र साथमा भएको झोला छाडेर खेतै खेत भागेका युवकमध्ये कामीटारका ब्लोनलाई पछ्याउँदै जाँदा पक्राउ गर्न सफल भएको र अर्का युवक फरार भएको उनले जानकारी दिए ।

प्रहरीलाई देखेपछि युवकहरूले फालेको झोला भित्रबाट पाँच वटा पोकामा रहेका २५ केजी गाँजा बरामद भएको उनको भनाइ छ । यस विषयमा आवश्यक अनुसन्धान भईरहेको इलाका प्रहरी कार्यालय लालबन्दीले जनाएको छ ।