काठमाडौं - नेपाली कांग्रेसका नेता एवं सांसद डा.सुनिलकुमार शर्माले पार्टीभित्र प्रतिशोधपूर्ण र औचित्यहीन गतिविधि बढेको आरोप लगाएका छन् । पार्टी नेतृत्व फरक मत राख्नेहरूलाई सिध्याउने गरी अघि बढेको बताए । 

उनले पार्टीको क्रियाशील सदस्यता लिने र नवीकरण गर्नेहरुको संख्या न्यून हुँदै गएकोमा दुःख समेत व्यक्त गरे । 

‘नेपाली कांग्रेस केन्द्रिय अनुशासन समितिद्धारा गरिएको भनिएको प्रतिशोधपूर्ण र औचित्यहीन अनुशासनको कारबाही’का सन्दर्भमा सोमबार काठमाडौंमा आयोजित विशेष भेलामा बोल्दै उनले इश्वर भन्दा माथि कोही नहुने भन्नै सबैलाई धैर्य गर्न आग्रह गरे ।

उनले कांग्रेसभित्र मन नपर्ने मान्छेलाई टिकट दिनबाट वञ्चित गरिनु मात्र नभइ झुट्टा आरोप लगाएर गिरफ्तार गराउने गरिएको समेत बताए । उनले चुनावमा असहयोग गरेको भन्दै कसैको राजनीति यात्रा सिध्याउन खोजेको समेत बताए । 

‘बसन्त भट्टराई आफ्नो जीवनको आहुति दिन तयार हुनुहुन्थ्यो । त्यस्तो मान्छेहरूलाई समानुपातिकबाट हटाएर २५ पल्टसम्म चुनाव हारेका नेताहरूलाई राज्यसत्तामा ल्याइयो । उनीहरूले डा.शेखर कोइरालाको गुटलाई वा फरक मत राख्नेहरूलाई राज्य सत्ताको दुरुपयोग गरेर धम्क्याएर थुनाउने काम गरियो,’उनले अगाडि भने,‘अदालत नभएको भए आज म तपाँईहरुको अघि म हुने थिएन । अदालतको एउटा आदेशको कारणले म तपाईंहरूको अगाडि छु । न्यायाधीशले विवेक नपुर्याएको भए मलाई दुई वर्षसम्म जेलमा थुनाउने योजना थियो ।’ त्यस्तै उनले विगतमा पूर्वको कांग्रेसलाई दुख्दा पश्चिमको कांग्रेसलाई दुख्थ्यो वा पीडा हुन्थ्यो तर आज पछिल्लो दश वर्षमा अवस्था बिग्रिएको बताए ।

त्यस्तै युवा नेता गुरुराज घिमिरेले कारबाहीको फाइल अघि नबढाउने भनेर पदाधिकारीहरूबीच भएको सहमति उल्लघंन गर्दै अनुशासन समितिले चालेको कदम त्रुटिपूर्ण रहेको बताए । 
उनले कांग्रेसभित्र फरक मत राख्ने र महाधिवेशनमा असहयोग गरेको बहानामा अनुशासनको कारबाहीको डन्डा चलाउने काम अमान्य भएको बताए । 

हालै मात्र नेपाली कांग्रेसले डेढ दर्जन नेतामाथि अनुशासनको कारबाही गरेको थियो । केन्द्रीय अनुशासन समितिको बैठकले २०७९ स्थानीय तह, प्रदेश सभा र प्रतिनिधि सभा निर्वाचनमा पार्टीका उम्मेदवार वा पार्टीले समर्थन गरेका उम्मेदवारका विरुद्ध असहयोग गरेको आरोप लगाउँदै कारबाही गरेको थियो ।

सोही निर्णय विरुद्ध डा.शेखर कोइराला समूहका नेताहरूले चर्को विरोध गर्दै आइरहेका छन् । उनीहरूले देशब्यापी कार्यक्रमहरूको आयोजना गर्दै अनुशासनको कारबाही नमान्ने चेतावनी दिँदै आएका छन् ।