रौतहट - रौतहट प्रहरीले साढे ३ वर्षपछि श्रीमतीको हत्यामा संग्लन श्रीमानलाई पक्राउ गरेको छ । ईशनाथ नगरपालिका वडा नम्बर ७ घिउरा टोल निवासी फैयाद मियाँलाई प्रहरीले पक्राउ गरेको हो । गहुँ खेतमा लगेर श्रीमती चाँदनी खातुनको घाँटीमा सलले बेरेर र मुख थिचेर हत्या गरेको आरोपमा पक्राउ गरेको प्रहरीले जानकारी दिएको छ । 

जिल्ला प्रहरी कार्यालय रौतहटले जारी गरेको प्रेस नोटमा ईशनाथ नगरपालिका–४ मठिया टोलस्थित भगाई साह बनियाको गहुँ खेतमा वि.सं.२०७८ साल माघ २६ गते खातुनको शव फेला परेको उल्लेख छ । श्रीमतीको हत्या गरी फरार रहेका श्रीमानलाई साढे तीन वर्षपछि पक्राउ गरिएको जिल्ला प्रहरी कार्यालय रौतहटका प्रवक्ता एवं डिएसपी दीपक कुमार रायले  जानकारी दिए ।

उनका अनुसार पक्राउ परेका फैयाद मियाँलाई रौतहट जिल्ला अदालतबाट म्याद थप गराई घटनाको सम्बन्धमा थप अनुसन्धान भइरहेको छ  । रौतहट प्रहरीले अदालतको फैसला कार्यान्वयन अन्तर्गत फरार प्रतिवादीहरूलाई पक्राउ गर्दै आएको छ ।