रौतहट - रौतहटमा औषधि पसल अनुगमन गर्न गएका औषधि व्यवस्था विभाग वीरगंजका कर्मचारीमाथि कुटपिट भएको छ ।
भारतीय सीमासँग जोडिएको जिल्लाको राजपुर नगरपालिका–४ स्थित औषधि पसल अनुगमन गर्न गएका विभागका कर्मचारीमाथि स्थानीय महिला र गाउँलेहरूले कुटपिट गरेका हुन् ।
विभागमा दर्ता नगरी औषधि पसल चलाएको, प्रतिबन्धित औषधि समेत बिक्री गरेको उजुरीको आधारमा औषधि व्यवस्था विभाग क्षेत्रीय कार्यालय वीरगंजको टोलीले सोमबार अनुगमन गर्न जाँदा स्थानीयबाट कुटिएका थिए।
टोलीलाई दर्जनौंको संख्यामा गाएका महिला पुरुषले लखेटी लखेटी कुटपिट गरेका थिए। टोलीमाथि कुटपिट र लखेटिएको भिडियो अहिले सामाजिक सञ्जाल फेसबुकमा भाइरल बनेको छ।
स्थानीयको कुटाईबाट फार्मेसी निरीक्षक ओम प्रकाश जयसवाल र फार्मेसी अधिकृत अमर शर्मा घाइते भएको औषधि व्यवस्था विभाग क्षेत्रीय कार्यालय वीरगन्जका प्रमुख शम्भु साहले बताएका छन्।
घाइते जयसवाल र शर्माको प्रादेशिक अस्पताल गौरमा सामान्य उपचारपछि सोमवार नै डिस्चार्ज भएको र अहिले अवस्था सामान्य रहेको छ । विभागका कर्मचारीसँगै जिल्ला प्रशासन कार्यालय रौतहटका खरिदार उमेशप्रसाद र जिल्ला प्रहरी कार्यालय रौतहटका इन्स्पेक्टर रुद्रराज कँडेल सहितको टोली अनुगमनमा गएको थियो।
इन्सपेक्टर कँडेलको मोबाइलको डिस्प्ले फुटाइदिएको उनले बताएका छन्। दर्जनौं महिला पुरुषको भीडले औषधि व्यवस्था विभागका कर्मचारीको कागजात समेत खोसिदिएको प्रहरीले जनाएको छ।
राजपुर गाउँका शेख नेक महम्मदले हार्डवेयर पसलको बोर्ड राखेर वर्षौदेखि औषधि पसल सञ्चालन गर्दै आएको उजुरी परेपछि विभागको टोली अनुगमनमा गएको बताइएको छ। रौतहटका सिडियो बिनोद कुमार खड्काले विभागका कर्मचारीको माग अनुसार हाम्रो एकजना र प्रहरीको एकजना प्रतिनिधि पठाएको बताएका छन्।
विभागका कर्मचारी माथि भएको कुटपिटको घटना बारे अनुसन्धान भइरहेको सिडियो खड्काले जानकारी दिए । स्रोतका अनुसार औषधि पसले शेख नेक महमदका दाजु भाइले पारिवारिक विवादको रिसिवि साध्न केही दिन अघि औषधि व्यवस्था विभाग वीरगंजमा उजुरी दिएका थिए।
पछिल्लो लामो समय देखि विभागका कर्मचारी र विभागको कार्यक्षेत्र अन्तर्गतको प्रायः सबै ठूला मेडिकल व्यवसायीसँग सेटिङ रहेको छ। उनीहरू ठूला औषधी पसलेसँग मासिक रूपमा रकम उठाउँदै आएको स्वयं मेडिकल व्यवसायीहरू बताउँछन्। यिनीहरू सेटिङमा रहेका ठूला ठूला मेडिकल स्टोरहरूमा कहिल्यै छापामारी अनुगमन गर्दैनन्।
तर, साना साना पसलमा अनुगमनको नाममा रकम असुली धन्दा चलाउने गरेको पाइन्छ। कुनै ठूलो मेडिकल स्टोरविरुद्ध कसैले बिभामा उजुरी दिए पछि यिनीहरू अनुगमन त जान्छन् तर जानु अघि खबर गरेर । यिनको खबर अनुसार जसको मेडिकलको सबै कागजात दुरुस्त छ, औषधिहरू दुरुस्त छ, त्यसले मात्रै मेडिकल खोलेका हुन्छन्। जसको दुरुस्त छैन अनुगमनको समयमा ती मेडिकल बन्द हुन्छन् । तर, साना औषधी व्यवसायी मात्र पर्छन्, यिनको जालोमा किनकी त्यसलाई अनुगमनबारे कसैले खबर नै गर्दैनन्।
केही समय अघि रौतहटको कटहरिया बजारमा पनि एउटा सानो औषधी पसलमा विभागको टोली छापा मार्न जाँदा ठूलो बबाल भएको हो। औषधी व्यवस्था विभाग क्षेत्रीय कार्यालय वीरगंजको कार्यक्षेत्र अन्तर्गत पर्सा, बारा, रौतहट, सर्लाही लगायतका जिल्लामा मूल राजमार्गमा ठूला ठूला मेडिकल स्टोर संचालनमा रहेको छ तर यिनीहरू त्यहाँ अनुगमन गर्न कहिल्यै जाँदैनन्।
अनुगमनमा सहभागी औषधी व्यवस्था विभाग क्षेत्रीय कार्यालय वीरगंजका सूचना अधिकारी ओम जैसवालले गृह मन्त्रालयमार्फत आएको उजुरीको आधारमा राजापुरस्थित औषधी पसल अनुगमनमा गएको बताए। स्थानीय महिलाहरूले गाउँमा सेवा दिँदै आएको मेडिकल बन्द गर्न दिन्नौं भन्दै अनुगमन टोली माथि हातपात गरेको स्वीकारेका छन्।
विगतमा विभागको हाकिम कर्मचारीले कुन औषधी व्यवसायीसँग सेटिङ गरेको थियो थाहा भएन तर अहिले त्यो आरोप गलत भएको प्रतिक्रिया दिएका छन्।
