काठमाडौं - तीन दलको शीर्ष नेताहरूको बैठकमा संक्रमणकालीन न्याय निरूपणको काम टुंग्याउन सर्च कमिटी गठन गरिने भएको छ।

सिंहदबारमा बसेको तीन दलका शीर्ष नेताको बैठकमा आयोगको अध्यक्ष तथा सदस्य नियुक्तिबारे छलफल भएको र सो छलफलले सर्च कमिटी गठन गर्न सहमति भएको बैठकमा सहभागी एमाले स्थायी कमिटी सदस्य वरिष्ठ अधिवक्ता अग्नि खरेलले जानकारी दिए ।

‘बेपत्ता पारिएका व्यक्तिहरूको छानबिन तथा सत्य निरूपण तथा मेलमिलाप आयोग ऐन २०७१ को दफा ३ को उपदफा ३ बमोजिम दुवै आयोगको अध्यक्ष तथा सदस्य नियुक्तिको लागि सिफारिस समिति सर्च कमिटी गठन प्रक्रिया अगाडि बढाउन प्रधानमन्त्रीले दुवै दलका नेताहरूसँग परामर्श गर्नुभयो । र परामर्श अनुसार सिफारिस समिति बढाउने प्रक्रिया अघि बढ्ने भएको छ,’ बैठक पछि उनले भने ।

यसैगरी, बैठकमा सहभागी गृहमन्त्री रमेश लेखकले बैठक पछि भने, ‘आज संक्रमणकालीन न्यायको विषय अगाडी बढाउन दुबै आयोग गठन गर्न सिफारिस समिति गठन गर्ने नेपाली काँग्रेस, नेकपा एमाले र माओवादी केन्द्रका शीर्ष नेताबीच सहमति भएको छ। अब सरकारले चाडै सिफारिस समिति गठन गर्नेछ।’

सत्य निरूपण तथा मेलमिलाप आयोग र बेपत्ता छानबिन आयोगका बारेमा निर्णय लिनका लागि तीन दलका शीर्ष नेताको बैठक बसेको हो । संक्रमणकालिन न्याय सम्बन्धी प्रक्रिया अघि नबढिरहेको बेलामा यो बैठक आव्हान भएको थियो ।

बैठकमा नेकपा एमालेका तर्फबाट प्रधानमन्त्री ओली र कानुनी सल्लाहकार अग्निप्रसाद खरेल, काँग्रेसबाट सभापति देउवा र गृह मन्त्री रमेश लेखक तथा माओवादीबाट अध्यक्ष प्रचण्ड, शक्ति बस्नेत, खिमलाल देवकोटा सहभागी रहेका थिए ।