भक्तपुर - चाँगुनारायण नगरपालिका–२ दुवाकोटमा मोटरसाइकलको ठक्करबाट अन्दाजी ६५ वर्षीय पैदलयात्रीको मृत्यु भएको छ ।
बुधबार दिउँसो करिब ३ बजे केएमसी अस्पतालबाट महाकालचोकतर्फ जाँदै गरेको कर्णाली प्रदेश ०२–००३ प ३७०७ नम्बरको मोटरसाइकलले सिटी ब्याङ्केट नजिक पैदल हिँडिरहेका पुरुषलाई ठक्कर दिएको थियो ।
ठक्करबाट गम्भीर घाइते भएका उनलाई उपचारका लागि केएमसी अस्पताल लगिएको थियो । उपचारकै क्रममा दिउँसो ३ः२० बजे उनको मृत्यु भएको प्रहरीले जनाएको छ ।
पैदलयात्रीलाई ठक्कर दिएपछि मोटरसाइकल अनियन्त्रित भई सडकमा रोकिराखेको बा २१ च ५६७४ नम्बरको कारमा समेत ठोक्किएको थियो । दुर्घटनामा कारको अगाडिको भागमा क्षति पुगेको छ ।
प्रहरीले मोटरसाइकल चालक जुम्लाको हिमा गाउँपालिका–५ घर भई हाल सृजनानगर बस्ने २० वर्षीय दिपेन्द्र शाहीलाई नियन्त्रणमा लिएको छ । घटनाबारे थप अनुसन्धान भइरहेको प्रहरीले जनाएको छ।
