काठमाडौं - रसुवाको भोटेकोशीमा आएको विनाशकारी बाढीपछि विभिन्न जिल्लामा फेला परेका ७३४ जनाको मृत्यु भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। अझै २ हजार ४९५ जना सम्पर्कविहीन छन्।
प्राधिकरणले आइतबार बिहान ९ बजेसम्म सार्वजनिक गरेको विवरणअनुसार सबैभन्दा धेरै चितवनमा २५९, नवलपरासी पूर्वमा १६४, गोरखामा ५८, नवलपरासी पश्चिममा ५२, नुवाकोटमा ५२, धादिङमा ५० र तनहुँमा ३६ शव फेला परेका छन्। रसुवामा १३ र अन्य जिल्लामा समेत शव फेला परेका छन्।
सम्पर्कविहीन हुनेमा रसुवाका ५६२, नुवाकोटका ११५, जलविद्युत् आयोजनाका १३३, मकवानपुरका ६५ तथा विदेशी नागरिक ५८ जना छन्। विदेशी पर्यटकसँग घुम्न गएका नेपाली १२७ जना र लाङटाङ राष्ट्रिय निकुञ्जका तीन जना पनि सम्पर्कविहीन रहेको विवरणमा उल्लेख छ। नेपाल प्रहरीका २७, नेपाली सेनाका ४५ र सशस्त्र प्रहरीका १३ जना पनि सम्पर्कविहीन छन्।
बाढीमा २४२ जना घाइते भएका छन्। प्रभावित क्षेत्रमा खोज तथा उद्धारका लागि सुरक्षा निकायसहितका टोली परिचालन गरिएको छ। हालसम्म ८ हजार १८६ जनाको उद्धार गरिएको प्राधिकरणले जनाएको छ।
जलविद्युत् आयोजनाको सुरुङबाट भदौ १२ र १३ गते उद्धार गरी २७७ जनालाई हेलिकोप्टरमार्फत सुरक्षित स्थानमा ल्याइएको छ। हालसम्म विदेशी नागरिकतर्फ २२७ जनाको हेलिकोप्टरबाट उद्धार गरिएको विवरणमा उल्लेख छ।
यसैबीच सरकारले प्रभावित क्षेत्रमा राहत सामग्री पठाउने काम तीव्र बनाएको छ। हालसम्म ३७ ट्रक खाद्य तथा गैरखाद्य सामग्री पठाइएको छ भने हेलिकोप्टरबाट सात खेप राहत सामग्री पुर्याइएको प्राधिकरणले जनाएको छ। सरकारले रसुवा र नुवाकोटलाई एक–एक करोड, धादिङलाई ४० लाख तथा १५ स्थानीय तहलाई ६ करोड ७५ लाख रुपैयाँ नगद राहत उपलब्ध गराएको छ।
