Harsamaya
जनकपुरलाई हराउँदै दुई खेल अगावै सुदूरपश्चिम प्लेअफमा प्रवेश

काठमाडौं - नेपाल प्रिमियर लिग (एनपीएल)मा आज भएको दोस्रो खेलमा साबिक विजेता जनकपुर बोल्ट्सलाई हराउँदै साबिक उपविजेता सुदूरपश्चिम रोयल्स प्लेअफमा स्थान पक्क गरेको छ । 

लिग चरणमा २ खेल खेल्नु अगावै ​सुदूरपश्चिमले ​शीर्ष चारमा आफ्नो स्थान पक्का गरेको छ । त्रिवि अन्तर्राष्ट्रिय क्रिकेट मैदान कीर्तिपुरमा शनिबार जनकपुरलाई ६ विकेटले पराजित गर्दै सुदूरपश्चिम एनपीएल दोस्रो सिजनमा प्लेअफमा स्थान बनाउने पहिलो टोली बनेको हो ।

जनकपुरले दिएको १४६ रनको लक्ष्य सुदूरपश्चिमले १७.४  ओभरमा ४ विकेटको क्षतिमा १४८ रन बनाउँदै पूरा गर्‍यो । सुदूरपश्चिमका लागि इशान पाण्डेले अर्धशतक बनाए । उनले ३५ बल खेल्दै ५ चौका र १ छक्का प्रहार गर्दै सर्वाधिक ५६ रन बनाए ।

यसअघि टस जितेर पहिला ब्याटिङ गरेको जनकपुरले निर्धारित २० ओभरमा ८ विकेटको क्षतिमा १४५ रन बनाएको थियो । जनकपुरका लागि सञ्जय कृष्णमूर्तिले सर्वाधिक ५०, जान निकलो लोफ्टी ईटनले ३९ रनको योगदान गरे । बलिङमा सुदूरपश्चिमका अभिनाश बोहराले चार, स्कट कुगेलेइन तीन विकेट लिए ।

प्रकाशित मिति: शनिबार, मंसिर १३, २०८२  १९:५०
प्रतिक्रिया दिनुहोस्
Weather Update