काठमाडौं -  नेकपा माओवादी केन्द्रले तोकिएकै मितिमै निर्वाचन गराउन सरकारसँग माग गरेको छ । आज बसेको माओवादी स्थायी कमिटीको बैठकले फागुन २१ मै निर्वाचन गर्न सरकारसँग माग गर्ने निर्णय गरेको प्रवक्ता अग्नि सापकोटाले बताए ।

बैठकले जेनजीसहित परिवर्तनकारी शक्तिहरूसँग संवाद गर्ने र समाजवादी मोर्चा र विचार मिल्ने शक्तिहरूसँग एकताको लागि प्रभावकारी पहल गर्ने समेत निर्णय गरेको सापकोटाले बताए ।

उनले भने, ‘बैठकले घोषित मितिमै निर्वाचन गराउन सरकारको पूर्ण  ध्यानाकर्षण गर्ने र पार्टीको तर्फबाट यथासम्भव भूमिका खेल्ने छ । जेनजी लगायत लोकतन्त्र, अग्रगमन र परिवर्तनका पक्षधरसँग वार्ता संवाद गरेर समझदारी कायम गर्ने  समेत निर्णय गरेको छ । समाजवादी मोर्चाका साथै अन्य विचार र राजनीतिक विचार मिल्नेसँग एकताका लागि प्रभावकारी पहल गर्ने समेत निर्णय गरेको छ ।’

यसै गरी नेकपा माओवादी केन्द्रले भोलि बस्ने केन्द्रीय कमिटी बैठकको लागि एजेन्डा तय गरेको । विशेष गरि महाधिवेशनमा जाने निर्णय गर्दै एजेन्डा तय गरेको सापकोटाले बताए । केन्द्रीय समिति भङ्ग गरेर संयोजक समितिको संयोजक अध्यक्ष पुष्पकमल दाहाल  हुने बताए ।