सिन्धुपाल्चोक - गायन रियालिटी शो नेपाल आइडल छैटौँ सिजनको विजेता सिन्धुपाल्चोककी गंगा सोनाम भएकी छन्। आइतबार राति सम्पन्न ग्राण्ड फिनालेमा उनले अन्य प्रतिस्पर्धीलाई पछि पार्दै उपाधि जितिन्।

गंगा सोनाम सिन्धुपाल्चोक इन्द्रावती गाउँपालिका–१०, बडहरे की २० वर्षीया युवती हुन्। उनी पिता ध्रुव सोनाम र माता सीता सोनामकी कान्छी सन्तान हुन्। गंगाले गाउँकै चण्डेश्वरी माविबाट कक्षा १२ उत्तीर्ण गरेकी छन्।

बाल्यकालदेखि नै सङ्गीतमा रुचि राख्ने गंगा विद्यालयका साङ्गीतिक कार्यक्रममा सक्रिय थिइन् । नेपाल आइडलको अडिसनमा उनले देउडा गीत ‘डोली चढाई लैजान्या हो सुवा’ गाएर निर्णायकहरूको मन जितेकी थिइन् । निर्णायक न्ह्यु बज्राचार्य, कालीप्रसाद बाँस्कोटा र इन्दिरा जोशीले उनको सुरिलो र मौलिक स्वरको खुलेर प्रशंसा गरेका थिए।

थिएटर राउन्डमा उनले ‘साँगुरी बारी नि हो’ गीत गाएर दर्शक र निर्णायकको मन जितिन्। प्रतियोगिताको क्रममा उनका गीत क्लिप्स सामाजिक सञ्जालमा भाइरल भए। निर्णायक न्ह्यु बज्राचार्यले उनलाई चर्चित गायिका रचना रिमालसँग तुलना गर्दै उनको स्वरलाई अर्ग्यानिक नेपाली स्वर भएको बताएका थिए।

गंगाले प्रतियोगितामा प्रवेश अघि ‘बेलबटम’ गीत गाइसकेकी थिइन्। अमृत भारतीको शब्द र रामकुमार नेपालीको सङ्गीत रहेको यस गीतमा गंगासहित रामकुमार नेपाली र सञ्चिता नेपालीको स्वर छ।

सिन्धुपाल्चोककी गंगाको अब नेपाली सङ्गीत क्षेत्रमा आफ्नो यात्रा नयाँ उचाइमा पुर्‍याउने ढोका खुला भएको छ । उसो त सङ्गीतलाई जीवनको लक्ष्य बनाउने उद्देश्यसहित केही महिनाअघि मात्रै गंगा काठमाडौँ प्रवेश गरेकी थिइन् ।

सोनाम लाई आइडल सिजन-६ को विजेता बनाउन सिन्धुपाल्चोकको राजनीतिक दलबल समेत जुर्मुराएको थियो।आफ्नै गाउँपालिकाले उनलाई युवा प्रोत्साहन अन्तर्गत एक लाखको दश हजार भोट गरेको थियो । त्यस्तै उनलाई विदेशबाट पनि भोटको ओइरो लागेको थियो । जनप्रतिनिधि ,संसद लगायत सम्पुर्ण सोनाम लाई जिताउन लागिपरेको थियो।

गंगा को अनुसार यदि नेपाल आइडलको सिजन नखुलेको भए उनी जापानमा अहिले काम गरिरहेको हुन्थिन् ।