सिन्धुपाल्चोक - नेपाल आइडल सिजन–६ की टप फाइभ फाइनलिष्ट  बन्न सफल इन्द्रावती गाउँपालिका–१० की प्रतिभाशाली गायिका गंगा सोनामलाई इन्द्रावती गाउँपालिकाले नगद १ लाख १० हजार रुपैयाँसहित सम्मान गर्ने भएको छ।

गाउँपालिकाको आज बसेको कार्यपालिका बैठकले सोनामलाई सम्मान गर्ने निर्णय गरेको गाउँपालिका अध्यक्ष झम्कनाथ नेपालले जानकारी दिए । उनले भने, “गंगा सोनामले राष्ट्रिय स्तरको प्रतिष्ठित प्रतियोगितामा उत्कृष्ट स्थान हासिल गरी गाउँपालिकाको नाम उज्यालो पार्नुभएको छ। उहाँको योगदानलाई कदर गर्दै गाउँपालिकाले नगदसहित सम्मान गर्ने निर्णय गरेको हो।”

ग्रामीण परिवेशमा हुर्केकी गंगा सोनामले सानैदेखि गीत–संगीतप्रति विशेष रुचि राख्दै आएकी थिइन्। औपचारिक संगीत तालिम कम भए पनि आफ्नो प्रतिभा, कडा परिश्रम र परिवारको साथले उहाँले राष्ट्रिय स्तरको प्रतिष्ठित प्लेटफर्मसम्म यात्रा गर्न सफल भएकी हुन्।

नेपाल आइडलको यात्रामा सोनामले आफ्ना मौलिक प्रस्तुति, मधुर स्वर र अनवरत मेहनतका कारण दर्शक र निर्णायक सबैको मन जित्न सफल भएकी छन्। अहिले उनले फाइनलमा प्रवेश गरेर गाउँ–समुदाय मात्र नभई सम्पूर्ण सिन्धुपाल्चोकलाई गौरवान्वित बनाएकी छिन्।