जनकपुर - मधेश प्रदेश सभा बैठक  अनिश्चितकालका लागि स्थगित भएको छ । बैठक सुरु भए लगत्तै प्रमुख प्रतिपक्षका सांसदहरूले उठेर विरोध जनाएपछि सभामुख रामचन्द्र मण्डलले आफ्नो कुरा राख्ने समय दिएका थिए ।

प्रमुख प्रतिपक्षका सांसदहरूले २०८२/०८३ को बजेट वक्तव्यमा विपक्षी बिना बहुमत पद्धतिबाट बजेट पारित गरिएको, नाटकीय रूपमा कार्यदल गठन गरी कार्यदलमा सरकारकै प्रतिनिधिलाई राखिनु र समस्या समाधान गर्नुको साटो अल्पमत र बहुमतको खेल गरेको आरोप लगाएका छन्  ।

बहुमतको बल प्रयोग गरी बजेट पास गरेकाले अब ऐन कानुन बनाउन किन हामीलाई खोज्नुपर्‍यो भनेर प्रमुख प्रतिपक्षका सांसदहरूले प्रश्न गरेका छन् ।

उनीहरूले बजेटमा देखिएको अनियमितता, बिचौलिया हाबी र रेड बुकमा देखिएको गडबडीलगायतका समस्या समाधान नभएसम्म र अर्थमन्त्रीले राजीनामा नदिएसम्म आफूहरूले बैठक अवरुद्ध राख्ने चेतावनी दिएका छन् ।

साथै पहिला गठन गरिएको संसदीय छानबिन समितिल अहिलेसम्म कार्यान्वयन किन भएन भनेर उनीहरूले समामुख मण्डललाई प्रश्न गरेका थिए ।

त्यसपछि समाभुख मण्डलले मधेश प्रदेश सभा बैठक अर्को सूचना नभएसम्मका लागि स्थगित भएको घोषणा गरे । करिब १ महिनापछि बसेको बैठक हिजो पनि जसपा नेपालका सांसदसहित प्रमुख प्रतिपक्षका सांसदहरूले अर्थमन्त्रीको राजीनामा माग गर्दै अवरुद्ध गरेका थिए ।