लन्डन - पछिल्लो समय विदेशमा बसोबास गर्ने नेपालीहरूले विदेशमै मन्दिरहरू स्थापना गरी धार्मिक गतिविधिहरूमा अग्रसर हुन थालेका छन् । साउन महिना सुरु भएयता बेलायतस्थित साउथ इष्ट लन्डनको प्लमस्टिडमा हिन्दु धर्मावलम्बी नेपालीहरूद्वारा स्थापित पशुपतिनाथ मन्दिरमा विशेष कार्यक्रमहरूको आयोजना भइरहेको छ ।

बेलायतको पहिलो हिन्दु मन्दिर भएकाले श्रद्धालु भक्तजनहरूको घुइँचो लाग्ने गर्दछ । विशेष गरी चाडपर्वका अवसरमा मन्दिरमा पूजा आराधना र भजन–कीर्तनको आयोजना हुने गरेको छ ।

बेलायतका नेपाली बस्ती भएका अन्य क्षेत्र अल्डरसट, बर्मिङ्घम, वेम्लीलगायत स्थानका स्थानीयहरूको विशेष गरी मन्दिरहरूमा भीड लाग्ने गर्दछ ।

यसै गरी अहिले साउन महिना भरी उक्त पशुपतिनाथ मन्दिरमा विशेष पूजाआजा भइरहेको छ । साथै यस महिना भरी हरेक दिन जसो भजन–कीर्तन, पूजापाठ हुने गरेको काठमाडौं, धुमवाराही घर भई हाल बेलायत बस्दै आएका पण्डित निलहरी घिमिरेले जानकारी दिए ।

उनले भने,‘अन्य महिनाका सोमबार मध्ये साउनको सोमबारको व्रत मात्रै लियो भने पनि वर्षभरिको पुण्य प्राप्त हुन्छ भन्ने पुरानो कथा अनुसार हामी दोस्रो हप्ताको साउन महिनाको सामूहिक पूजा मन्दिरमा आयोजना गर्ने तयारीमा छौँ ।’

त्यस्तै उनले बेलायतमा राम, राधाकृष्ण र स्वामी नारायण मन्दिर जस्ता अन्य मन्दिरहरू रहेतापनि सबैभन्दा बढि चहलपहल पशुपतिनाथमा नै हुने गरेको बताए । उनको अनुसार मन्दिरमा विषेशगरी जनै पूर्णिमा, तीज, दसैँ, शिवरात्रि जस्ता पर्वहरूमा धेरै भक्तजनहरूको भिडभाड हुने गर्छ ।

उनले भने,‘बेलायतमा अहिले एकदमै धेरै चाप भएको मन्दिर नै यही हो । भक्तजनहरूले पनि बेलायतमै रहेका राम, राधाकृष्ण, स्वामी नारायण मन्दिरमा भन्दा यहाँ धेरै नै चहलपहल हुने गरेको बताउनुहुन्छ । यहाँ नेपाली समुदाय पनि ठूलो छ । टाढा टाढाबाट आउनुहुन्छ । जनै पूर्णिमा, दसैँ, शिवरात्रीमा हजारौं भक्तजनहरु आउनुहुन्छ । तीजमा पनि धेरै भिडभाड हुने गर्छ ।’

पण्डित घिमिरेका अनुसार जुनसुकै देशमा जाँदा पनि नेपालीहरुलाई एकजुट हुने थलो खड्किने गरेकाले धार्मिक आस्थाको केन्द्रको स्थापना हुनु आवश्यक छ । विदेशमा पनि मन्दिर निर्माण हुनु आवश्यक रहेको उनले औंल्याए ।

‘मैंले बुझे अनुसार कुनैबेला थाइल्यान्डमा मन्दिर निर्माण गरियो । जसका कारण नेपाली बोल्न नजान्ने बच्चाहरुलाई नेपाली बोल्ने वातावरण बन्यो । सोही स्थानको अनुभवलाई लिएर बेलायतमा पनि मन्दिर निर्माणको अभियान सुरु भएको हो,’ उनले भने ।

हाल पशुपतिनाथ मन्दिर रहेको स्थानलाई फराकिलो बनाउनुपर्ने र सामूदायिक हलको आवश्यक रहेकाले आफूहरुले अभियान बनाउने योजना बनाइरहेको बताए । बेलायतको प्रमुख धर्म क्रिश्चियन रहेकाले ४६.३० प्रतिशत मानिसहरु क्रिश्चियन धर्ममा आबद्ध छन् भने हिन्दु धर्म मान्ने १.८ प्रतिशतमा छन् ।