धनगढी - कैलालीको धनगढी उपमहानगरपालिका–१५ स्थित ज्योति आयल स्टोर नजिक मोटरसाइकल र स्कुटर एकआपसमा ठोक्किँदा स्कुटर चालकको मृत्यु भएको छ भने चार जना घाइते भएका छन् ।
बुधबार साँझ ७ बजे धनगढीबाट फूलबारीतर्फ जाँदै गरेको से ४ प ४५८५ नम्बरको मोटरसाइकल र विपरीत दिशाबाट आउँदै गरेको सु.प.प्र. ०२००३ प ८१५५ नम्बरको स्कुटर एकआपसमा ठोक्किएका हुन् ।
दुर्घटनामा मोटरसाइकल चालकसहित तीन जना र स्कुटर चालकसहित दुई जना गरी पाँच जना घाइते भएका थिए । घाइते सबैलाई उपचारका लागि निसर्ग अस्पताल धनगढी पठाइएको थियो ।
घाइतेमध्ये स्कुटर चालक धनगढी उपमहानगरपालिका–५ तारानगर निवासी ३५ वर्षीया सुशिला बमलाई थप उपचारका लागि बिहीबार बिहान २ बजेर २६ मिनेटमा मायामेट्रो अस्पताल धनगढी पठाइएको थियो । उपचारका क्रममा उनको मृत्यु भएको प्रहरीले जनाएको छ ।
मृतक बमको शव हाल मायामेट्रो अस्पतालमै रहेको छ । दुर्घटनामा संलग्न दुवै सवारीसाधन प्रहरीले नियन्त्रणमा लिएको छ । दुर्घटनाबारे थप अनुसन्धान भइरहेको छ ।
