काठमाडौं - राष्ट्रिय प्रजातन्त्र पार्टीका अध्यक्ष तथा सांसद राजेन्द्र लिङ्देनले प्रमुख प्रतिपक्ष दल नेकपा माओवादीले संसद् खोल्नको लागि सत्तापक्षसँग गरेको सहमति लुटतन्त्रको रक्षाका लागि भएको आरोप लगाएका छन् । 

शुक्रबार बसेको प्रतिनिधिसभाको बैठकमा बोल्दै उनले प्रमुख प्रतिपक्ष दलले गणतन्त्रको रक्षाकोलागि सहमति भएको भनेर पछाडि हटेको भन्दै तर होइन लुटतन्त्रको रक्षाको लागि सहमति भएको आरोप लगाएका हुन् ।

उनले भने,‘दृढतापूर्वक आत्मसमर्पण गर्नुभएको सुन्न पाइयो । दृढतापूर्वक बहादुरका साथ पछाडि सरेको सुन्न पाइयो । हुने नै यही थियो । गणतन्त्रको रक्षाका लागि यो सहमति भएको भनियो तर होइन लुटतन्त्रको रक्षाको लागि भएको हो ।’

त्यस्तै उनले देशमा रोजगारी नपाएर अवसरको खोजीमा विदेश जाने युवाहरूको भावनाको शोषण गर्दै दैनिक रूपमा भिजिट भिसामा जानेसँग ५० लाख असुली गरेको विभिन्न तथ्यहरू सार्वजनिक रूपमा आएको भन्दै गृहमन्त्रीको नैतिकताको मात्र नभएर देशको बेइज्जत भएको बताए । गृहमन्त्रीले नौतिकताको आधारमा राजीनामा दिएर अनुसन्धानलाई सघाउनुपर्ने समेत उनले बताए ।