काठमाडौं - रसुवास्थित भोटेकोशी नदीमा भदौ १० गते आएको विनाशकारी बाढीपछि प्रभावित क्षेत्रमा जारी खोज तथा उद्धार अभियानबाट हालसम्म १३ हजार ३९६ जनाको उद्धार गरिएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रवक्ता शान्ति महतका अनुसार उद्धार गरिएकामध्ये ३ हजार ५३३ जना रसुवा, नुवाकोट र धादिङका ३९ वटा होल्डिङ सेन्टरमा सुरक्षित रूपमा आश्रय लिइरहेका छन् ।

बाढीपछि हालसम्म १ हजार ३५८ जनाको शव फेला परेको छ । तीमध्ये ९८ जनाको सनाखत गरी शव आफन्तलाई बुझाइएको प्रवक्ता महतले जानकारी दिइन् । 

प्राधिकरणका अनुसार अझै ५ हजार ३२६ जना सम्पर्कविहीन छन् । सम्पर्कविहीनमध्ये सबैभन्दा बढी रसुवाका २ हजार ८६० र नुवाकोटका १ हजार ९८१ जना रहेका छन् । बाँकीमा नेपाली सेना, नेपाल प्रहरी, सशस्त्र प्रहरी, विभिन्न सरकारी निकायका कर्मचारी तथा अन्य जिल्लाका नागरिक रहेको प्राधिकरणले जनाएको छ ।

बाढीपछि घाइते तथा प्रभावित गरी हालसम्म ६ हजार ८२७ जनाले प्राथमिक उपचार सेवा लिएका छन् । विभिन्न १० अस्पतालमा उपचार गराइरहेका ३२७ जनामध्ये २४२ जना उपचारपछि डिस्चार्ज भइसकेका छन् । नेपाली सेनाबाट ३ हजार ४०४ जना र सशस्त्र प्रहरीबाट ३ हजार ९६ जनाले स्वास्थ्य उपचार सेवा लिएका छन् ।

बाढीका कारण विस्थापित तथा प्रभावित नागरिकलाई सुरक्षित स्थानमा राख्दै उनीहरूको आधारभूत आवश्यकता पूरा गर्न राज्यका विभिन्न निकायले राहत तथा व्यवस्थापनको कामलाई निरन्तरता दिएका छन् ।

भोटेकोशी बाढीबाट ठूलो मानवीय तथा भौतिक क्षति भएपछि नेपाल प्रहरी, नेपाली सेना, सशस्त्र प्रहरी, स्थानीय तह तथा विभिन्न सरकारी र गैरसरकारी निकाय खोजी, उद्धार, उपचार र राहत व्यवस्थापनमा परिचालित छन् ।

प्राधिकरणका अनुसार सम्पर्कविहीन नागरिकको खोजी तथा उद्धार कार्यलाई थप तीव्र बनाइएको छ । प्रभावित क्षेत्रमा उद्धार, राहत तथा पुनःस्थापनाका कामलाई समन्वयात्मक रूपमा अघि बढाइएको प्राधिकरणले जनाएको छ ।