काठमाडौँ - देशभर मौसममा उल्लेख्य परिवर्तन देखिएको छ । पश्चिमी न्यून चापीय प्रणाली र स्थानीय वायूको संयुक्त प्रभावका कारण अहिले अधिकांश भू–भागमा बाक्लो बादल लागेको छ, जसले वर्षा र हिमपातको सम्भावना बढाएको मौसम पूर्वानुमान महाशाखाले जनाएको छ ।
हाल मधेशदेखि सुदूरपश्चिमसम्मका प्रदेशहरू तथा पहाडी र हिमाली क्षेत्रहरूमा व्यापक बदली छ । बागमती र गण्डकी प्रदेशका केही स्थानमा भने मेघगर्जन र चट्याङ्गसहित मध्यम वर्षा तथा हिमपात भइरहेको छ, जसले दैनिक गतिविधिमा आंशिक असर पार्न थालेको छ ।
महाशाखाका अनुसार आज दिउँसो देशभर नै मौसम बदली रहनेछ । विशेषगरी कोशी, मधेश, बागमती र गण्डकी प्रदेशका धेरै स्थानमा तथा लुम्बिनी, कर्णाली र सुदूरपश्चिमका केही स्थानमा मेघगर्जन, चट्याङ्ग, असिना र हावाहुरीसहित मध्यम वर्षा तथा हिमपातको सम्भावना रहेको छ । यसले यातायात, कृषि र जनजीवनमा प्रभाव पार्न सक्ने अनुमान गरिएको छ ।
राति पनि देशभर आंशिकदेखि सामान्य बदली रहनेछ । हिमाली क्षेत्रमा हल्का वर्षा तथा हिमपात र पहाडी भू–भागका एक–दुई स्थानमा चट्याङ्गसहित हल्का वर्षा हुने सम्भावना रहेको छ ।
मौसमविद्हरूले विशेषगरी पहाडी र हिमाली क्षेत्रमा यात्रा गर्नेहरूलाई सतर्क रहन र चट्याङ्ग तथा हावाहुरीबाट बच्न आवश्यक सावधानी अपनाउन आग्रह गरेका छन् ।
