काठमाडौं - एमाले महाधिवेशन केन्द्रीय निर्वाचन आयोगले नयाँ नेतृत्वका लागि भएको एमालेको मतदानको मतपरिणाम ३ घण्टामा सार्वजनिक गर्ने तयारी भइरहेको जनएको छ ।  केन्द्रीय निर्वाचन आयोग डा विजय सुब्बाले मतदान सकिएपछि प्राविधिक काम सकेर मतगणना शुरु भएको ३ घण्टामा परिणाम सार्वजनिक गरिने जानकारी दिए । 

मतगणना अझै सुरु भइसकेको छैन । ८ बजेबाट मतगणना सुरु गर्ने भनिएपनि प्राविधिक काम भइरहेकाले अझै करिब २ घण्टपछिमात्रै मतगणना सुरु हुने उनले जानकारी दिए । अहिले चिप्स निकालेर जम्मा गर्ने काम धमाधम भइरहेको छ । 

मतगणनामा उम्मेदवारको एक/एक जना  प्रतिनिधि  बस्नेछन् । मतगणनापछि सबैको एकैपटक मतपरिणाम आउने उनले बताए । ‘काउन्ट गर्दा गर्दै स्क्रिनमा देखाउने कुरा पनि भएको छ’ उनले भने ‘हेरौं टेक्निकल टिमले के के गर्छ ?’

केन्द्रीय निर्वाचन आयोग उपाध्यक्ष पोखरेलका अनुसार कुल २ हजार २ सय ६३ प्रतिनिधि मतदाता रहेकामा ३६ जना मतदानमा अनुपस्थित भए। मतदान बुधबार बिहान ९:१२ बजेदेखि सुरु भएको थियो।  

एमालेको ३०१ सदस्यीय केन्द्रीय कमिटी चयनका लागि करिब ६४२ जनाले उम्मेदवारी दिएका छन्। मतदान प्रक्रियामा ८० वटा विद्युतीय भोटिङ मेसिन प्रयोग गरिएको थियो।