काठमाडौं - राष्ट्रिय प्रजातन्त्र पार्टीका अध्यक्ष राजेन्द्र लिङ्देनसहित नेताहरूले प्रधानमन्त्री सुशीला कार्कीलाई भेटेर राजा, राजनीतिक दल र जेनजीबीच नवीन समझदारीको प्रस्ताव गरेको छ।

शनिबार बालुवाटारस्थित निवासमा प्रधानमन्त्रीसमक्ष पाँच बुँदे ज्ञापन पत्र बुझाएका छन्। ज्ञापन पत्रमा राप्रपाले मुलुकको दीर्घकालीन हित र राजनीतिक निकासका लागि राजा, राजनीतिक दल जेनजी लगायतका पक्षहरूबीच नवीन समझदारीको प्रस्ताव अघि सारेको हो।

राप्रपाले जेनजी आन्दोलन २०८४ सालमा हुने निर्वाचनलाई दुई वर्षअघि धकेल्नलाई नभएको बताएको छ। फागुन २१ गते हुने निर्वाचना अन्तर जिल्ला र विदेशबाट मतदान गर्न पाउने सुनिश्चितता गर्न पनि माग राखेको छ।

त्यस्तै जेनजी आन्दोलनमा सहभागी युवाहरूलाई प्रहरीले पक्राउ गरेको विषयमा पनि तत्काल रोक्न राप्रपाले माग गरेको छ। आन्दोलनका सहिद परिवार र घाइतेहरूको पनि माग पूरा गर्न माग राखेको छ। राप्रपाले प्रधानमन्त्रीसँग भेट्न नपाएका जेनजी प्रतिनिधिहरूबारे पनि चासो राखेको छ।

‘सरकारसँग विभिन्न मागहरू लिएर प्रदर्शनमा रहेका र प्रधानमन्त्रीसँग भेट गर्न चाहेका जेनजीहरु माथि भइरहेको दमन र उपेक्षा उपयुक्त छैन। यसप्रकारको कार्य तत्काल बन्द गरियोस् र वार्ता संवादबाट वातावरणलाई शान्त बनाउने प्रयास होस्,’ ज्ञापन पत्रमा भनिएको छ।