काठमाडौं - सरकारले एमसिए–नेपालले निर्माण गर्ने ४०० केभि विद्युत प्रसारण लाइनका लागि विभिन्न जिल्लामा पर्ने प्रसारण लाइनको दायाँबायाँका जग्गामा संरचना निर्माण गर्न र रुख रोप्न निषेध गरेको छ ।
मंगलबार सिंहदरबारमा मन्त्रिपरिषद्का निर्णय सार्वजनिक गर्दै सरकारका प्रवक्ता एवं सूचना तथा सञ्चारमन्त्री जगदीश खरेलले एमसिए–नेपालले निर्माण गर्ने ४०० केभि विद्युत प्रसारणलाइनका लागि नवलपरासी, पाल्पा, तनहूँ, चितवन, धादिङ, सिन्धुपाल्चोक, काठमाडौं, नुवाकोट र मकवानपुर जिल्लामा पर्ने विधुत प्रसारणलाइनको मध्यरेखाबाट २३–२३ मिटर दायाँ र बायाँमा पर्ने करिव १३८१ हेक्टर क्षेत्रफलका जग्गामा कुनै प्रकारको संरचना निर्माण गर्न तथा रुख रोप्न नपाउने गरि निषेध गर्ने निर्णय भएको जानकारी दिए ।
बैठकले ऊर्जा मन्त्रालय र मन्त्रालय अन्तर्गतका निकायको संगठन तथा व्यवस्थापन सर्वेक्षण गर्न पूर्वस्वीकृति प्रदान गरेको छ भने नेपाली सेनाका दुई जना प्रमुख सेनानीलाई महासेनानी दर्जामा बढुवा गर्ने निर्णय गरेको छ ।
त्यसैगरि बैठकले स्वास्थ्य सेवा बिभागको महानिर्देशक पदमा कार्यरत अतिरिक्त स्वास्थ सचिव डा टंक प्रसार बारकोटीले दिएको राजीनामा स्वीकृत गरेको प्रवक्ता खरेलले बताए ।
प्रवक्ता खरेलले कानुन विधि अनुसार प्रभावकारी रुपमा काम गर्न सक्ने योग्यहरुबाट प्रहरी महानिरिक्षक चयन गरिएको बताए ।
![प्रसारण लाइनको दायाँबायाँका जग्गामा संरचना निर्माण गर्न र रूख रोप्न निषेध [भिडियोसहित]](https://www.harsamaya.com/uploads/posts/150X150/jagdisha-kharel-1758880796.jpg)