काठमाडौं - प्रधानमन्त्री केपी शर्मा ओलीले नेपालको शीर्ष सदरमुकाम सिमकोट सडक सञ्जालमा जोडिएकोमा आफू असाध्यै खुसी भएको बताएका छन् ।  

राष्ट्रिय सडक सञ्चालनसँग जोडिन बाँकी नेपालको एक मात्रै जिल्ला हुम्लाको सदरमुकाम सिमकोट जोडिएपछि सबैभन्दा बढी खुसी म आफै छु’, प्रधानमन्त्री ओलीले भने, ’यो सफलता हासिल गर्ने नेपाली सेनालाई हार्दिक आभार व्यक्त गर्दछु ।’

सिमकोट सडकसँग जोड्नका लागि आफूलाई नेकपा एमाले उपमहासचिव प्रदीप ज्ञवालीले हुम्लाका राजनीतिक दलहरूको संयुक्त ज्ञापन पत्र र ज्ञवाली हुम्ला पुगेर हुम्लीको यो गुनासो आफू समक्ष पुर्‍याएपछि यो कामले औपचारिकता पाएको बताउनु भएका ओलीले सरकारको प्रस्तावलाई पनि नेपाली सेनाले सहजै स्वीकार गरी अहिले जोड्न सफल भएको बताउँदै अब हुम्ला विकासको बाटो खुलेको प्रतिक्रिया दिए ।

हुम्ला राष्ट्रिय सडक सञ्जालमा मात्र जोडिएको छैन हुम्ला समृद्धको बाटो समेत औपचारिक रूपमा खुलेको छ’, पुल उद्घाटनका क्रममा आयोजित कार्यक्रमलाई सम्बोधन गर्दै प्रधानमन्त्री ओलीले भने, ’हुम्ला अब उत्तर दक्षिण मार्गले जोडिने जिल्ला मात्र नभएर हुम्ला पश्चिम नेपालको रणनीतिक महत्त्व बोकेको जिल्लाका रूपमा समेत स्थापित भएको छ ।

आफू परराष्ट्र मन्त्री हुँदा हुम्लाको बाटो र सडकसँग जोड्न पहल गरेको बताउनु भएका प्रधानमन्त्री ओलीले सुरुवातीमा आफूले पहल गर्नुका साथै अहिले आएर राष्ट्रिय सडकसँग जोडिएको जिल्ला उद्घाटन गर्न पाउनु ठुलो रहेको  भनाइ राखेका थिए । 

४० दिनमा नेपाली सेनाले जोडेको खार्पु बेलिब्रीजमा रिवन काटेर गाडी पास गराए पछि औपचारिक रूपमा हुम्ला सडकले उत्तर दक्षिण जोडिए सँगै २६ वर्षदेखि सडक सपनामा बिताएको शीर्ष सदरमुकाम सिमकोट आजदेखि राष्ट्रिय सडक सञ्जालमा जोडिएको छ । 

गएको कार्तिक २० गते बसेको मन्त्रीपरिषद् बैठकले हुम्ला सदरमुकाम सिमकोटलाई राष्ट्रिय सडक सञ्जालमा जोड्ने कर्णाली कोरिडोर अन्तरगतको खार्पु खोलामा निर्माणाधीन मोटरेवल पुलको काममा ढिलाइ भएपछि सरकारले अल्पकालीन रूपमा भए पनि सिमकोटलाई राष्ट्रिय सडक सञ्जालमा जोड्न बेलिब्रीजको विकल्प अघि सारेको थियो । 

खार्पु नदीमा निर्माण भएको पुल उद्घाटन गर्दै एमाले अध्यक्ष समेत रहेका प्रधानमन्त्री ओलीले अब हुम्ला राष्ट्रिय र अन्तर्राष्ट्रिय रूपमा टाढा नभएको बताए । ।