काठमाडौं - नेपाली कांग्रेसका सभापति शेरबहादुर देउवाले वीपी कोइराला स्वास्थ्य विज्ञान प्रतिष्ठानलाई छाता ऐनबाट अलग्याएर चिकित्सा विज्ञान विश्वविद्यालय बनाउनुपर्ने बताएका छन् । 

काठमाडौंमा रहेका धरानका सर्वदलीय टोलीसँग बूढानीलकण्ठमा छलफल गर्दै वीपी प्रतिष्ठानलाई एकीकृत स्वास्थ्य विज्ञान प्रतिष्ठान ऐनमा लान नहुने समेत बताए । 

उनले वीपीको इतिहास, संरचना र यसले निर्माण गरेको विरासतलाई हेर्ने हो भने छाता ऐनमा समाहित गरेर वीपीलाई साँघुरो बनाउन नहुने विचार राखेको टोलीमा सहभागी कांग्रेस धरान सभापति श्याम पोखरेलले बूढानीलकण्ठबाट जानकारी दिए । 

सरकारले ‘एकीकृत स्वास्थ्य विज्ञान प्रतिष्ठान ऐन २०८२’ जारी गर्दै धरानको वीपी कोइराला स्वास्थ्य विज्ञान प्रतिष्ठानसहित विभिन्न ६ वटा स्वास्थ्य प्रतिष्ठानहरूलाई एउटै छाता ऐनमा समेट्नखोजेपछि धरानका राजनीतिक दलहरू त्यसलाई सच्याउन माग गर्दै काठमाडौंमा सरकार र दलका नेताहरूलाई ध्यानाकर्षण गराउँदै आइरहेका छन् । 

वीपी प्रतिष्ठानलाई चिकित्सा विज्ञान विश्वविद्यालय बनाउनुपर्ने र छाता ऐनबाट अलग गर्नुपर्ने माग गर्दै नेपाली कांग्रेस, नेकपा, (एमाले), नेकपा (माओवद्यी केन्द्र) र जनता समाजवादी पार्टी नेपाल असार १२ गतेदेखि काठमाडौंमा अभियान चलाइरहेका छन् । 

टोलीले प्रधानमन्त्री तथा एमाले अध्यक्ष केपी शर्मा ओली, पूर्व प्रधानमन्त्री तथा माओवादी केन्द्रका अध्यक्ष प्रचण्ड, पूर्वस्वास्थ्य मन्त्री तथा कांग्रेस महामन्त्री गगन थापालाई भेटेर ध्यानाकर्षण गराइसकेको छ । टोलीले आज सभापति शेरबहादुर देउवाको निवासमै पुगेर भेट गरेको हो ।

टोलीमा नेकपा (एमाले) कोशी प्रदेश मौसम राई, नेपाली कांग्रेस धरान सभापति श्याम पोखरेल, नेकपा (माओवादी केन्द्र) धरान अध्यक्ष उद्धव लिम्बू, जनता समाजवादी पार्टी नेपालका धरान अध्यक्ष ताजुव लिम्बू र धरान उपमहानगर प्रवक्ता तथा १७ नम्बर वडा अध्यक्ष सूर्यप्रसाद भट्टराई (मनोज), सहभागी रहेका छन् । 

टोलीमा एमाले कोशी प्रदेश सदस्य भीमज्वाला राई, नेपाली कांग्रेस कोशी प्रदेश सम्मेलन सदस्य कुसुम ओली आचार्य, नेपाली कांग्रेस धरान सचिव हिमाल श्रेष्ठ तथा कांग्रेसका युवा एवम् यातायात व्यवसायी नेता सरोज सिटौला लगायत सहभागी रहेका छन् ।