जनकपुर - आज जानकी नवमी धुमधामका साथ मनाईंदै छ । वैशाख शुक्ल नवमीको दिनलाई जानकी नवमीको रूपमा मनाउने गरिन्छ ।
माता सीताको जन्मोत्सवको दिन आज खासगरी जनकपुरधामस्थित जानकी मन्दिरमा विभिन्न कार्यक्रम गरी मनाउनुका साथै देशभरिका विभिन्न स्थानमा रहेका सीता माताको मन्दिरमा विशेष पूजा पाठ गरिँदैछ ।
जानकी नवमीको अवसरमा जनकपुरधामस्थित ऐतिहासिक दुधमती नदीमा साधुसन्त तथा भक्तजनहरुले साही स्नान गरेका छन् । सीता माता धर्तीबाट निस्किए पछि उनलाई दूध खुवाउन दुधमती नदि प्रकट भएको जनविश्वास रहेको छ । रामायणकालीन समयमा यस नदीमा दूध बग्ने र सोही दूध सीता माताले पिउने गरेको बताइन्छ ।
जानकी नवमीको अवसरमा आज जानकी मन्दिरमा बधाइगान, प्राकट्य उत्सव, जानकी डोला यात्रा, तिल्कोत्सव र दिप प्रज्वलन गर्ने कार्यक्रम रहेको जानकी मन्दिरका उत्तराधिकारी महन्त रामरोशन दासले जानकारी दिए ।
मधेश प्रदेश सरकारले जानकी नवमीको अवसरमा मंगलबार सार्वजनिक बिदा समेत दिएको छ ।
