सुर्खेत - सुर्खेतको वीरेन्द्रनगरमा लागुऔषध खैरो हेरोइनसहित चार जना पक्राउ परेका छन् ।
लागुऔषध नियन्त्रण ब्युरो शाखा कार्यालय सुर्खेतबाट खटिएको प्रहरी टोलीले शनिबार वीरेन्द्रनगर नगरपालिका–१३, करेखोला क्षेत्रबाट दुई जनालाई खैरो हेरोइनसहित पक्राउ गरेको हो ।
प्रहरीका अनुसार पक्राउ पर्नेमा वीरेन्द्रनगर नगरपालिका–१३ निवासी २३ वर्षीय रुपेश घर्ती मगर र २७ वर्षीय कुमार बहादुर राठकोटी रहेका छन् । उनीहरूको साथबाट ३.१९० ग्राम खैरो हेरोइन बरामद गरिएको थियो ।
उनीहरूमाथि थप अनुसन्धान गर्ने क्रममा लागुऔषध कारोबारमा संलग्न वीरेन्द्रनगर नगरपालिका–१२ निवासी ३१ वर्षीय बालराम पौडेल र ३५ वर्षीय नवराज चालिसेलाई समेत पक्राउ गरिएको प्रहरीले जनाएको छ । उनीहरूबाट थप ८.८३० ग्राम खैरो हेरोइन बरामद गरिएको छ ।
प्रहरीले चारै जनाको साथबाट कुल १२.०२ ग्राम खैरो हेरोइन र चार थान मोबाइल बरामद गरेको छ ।
पक्राउ परेका चारै जनालाई आवश्यक अनुसन्धान तथा कारबाहीका लागि जिल्ला प्रहरी कार्यालय सुर्खेतमा बुझाइएको लागुऔषध नियन्त्रण ब्युरोले जनाएको छ ।
