काठमाडौं - मध्यपूर्वमा बढ्दो तनावबीच इजरायल र लेबनानबीच १० दिने युद्धविराममा सहमति जुटेसँगै क्षेत्रीय परिस्थिति केही सहज हुने संकेत देखिएको छ।

युद्धविराम कार्यान्वयनमा आएपछि इरानले पनि महत्वपूर्ण सामुद्रिक मार्ग हर्मुज जलमार्ग व्यावसायिक जहाजका लागि खुला गर्ने घोषणा गरेको छ। यो निर्णयले अन्तर्राष्ट्रिय व्यापार र ऊर्जा आपूर्तिमा सकारात्मक प्रभाव पार्ने अपेक्षा गरिएको छ।

बेन्जामिन नेतन्याहू ले युद्धविरामलाई ऐतिहासिक अवसरका रूपमा व्याख्या गर्दै दीर्घकालीन सम्झौताको सम्भावना औँल्याएका छन्। इरान समर्थित हिज्बुल्लाहले पनि सहमति पालना गर्ने प्रतिबद्धता जनाएको छ, यद्यपि उसले इजरायली सेनाको गतिविधि रोक्नुपर्ने सर्त अघि सारेको छ।

अमेरिकी राष्ट्रपति डोनाल्ड ट्रम्पले हर्मुज जलमार्ग खुला गर्ने इरानको निर्णयको स्वागत गर्दै यसलाई सकारात्मक कदम बताएका छन्। उनले युद्ध चाँडै अन्त्य हुनुपर्ने धारणा समेत व्यक्त गरेका छन्।

यता, रूसले पनि युद्धविरामको समर्थन गर्दै यसले दीर्घकालीन शान्ति सम्झौताका लागि आधार तयार पार्ने विश्वास व्यक्त गरेको छ। क्रेमलिनका प्रवक्ता दिमित्री पेस्कोभले सैन्य तनाव नदोहोर्याउने गरी सहमति अघि बढ्नुपर्ने बताएका छन्।

यसअघि अमेरिका र इरानबीच इस्लामाबादमा भएको वार्ता असफल भए पनि दोस्रो चरणको पहल जारी रहेको जनाइएको छ।

विश्वका प्रमुख शक्ति राष्ट्रहरूले युद्धविरामको स्वागत गरेका छन् । विश्लेषकहरूका अनुसार छोटो अवधिको भए पनि यो सहमतिले मध्यपूर्वमा दीर्घकालीन स्थायित्वतर्फको सम्भावित बाटो खोल्न सक्ने देखिएको छ।