काठमाडौं - नेपाली काँग्रेसका महामन्त्री प्रदीप पौडेलले कुनै दलसँग आफूहरूको प्रतिस्पर्धा नभएको बताएका छन् । आइतबार सामाखुशीमा आयोजित चुनावी सभालाई सम्बोधन गर्दै उनले अतिवाद संस्थागत हुन नदिने बताए ।

अहिले अतिवाद संस्थागत हुन्छ कि हुँदैन भन्ने प्रश्न रहेको भन्दै उनले काँग्रेस हरेक परिवर्तनको आन्दोलनमा नेतृत्वदायी भूमिकामा रहेको र जेनजी आन्दोलनमा नागरिकले गरेको खबरदारीबाट पनि सच्चिएको पार्टी भएको बताए ।

‘काँग्रेस अधिकारका लागि लामो समयदेखि बलिदान गरेको पार्टी हो,’ उनले भने, ‘को पहिले जन्मियो त्यस आधारमा पुरानो हुँदैन । काँग्रेसलाई पहिले जन्मिएर नयाँ ढङ्गबाट नागरिकको विश्वास जितेर अघि बढेको रूपान्तरित पार्टीका रूपमा बुझ्नुपर्छ ।’

सभामा बोल्दै महामन्त्री पौडेलले देशमा देखिएका समस्यासँग आफूहरूको लडाइँ रहेको बताए । ‘हामी अर्कालाई आलोचना गर्न होइन गरिबी, बेरोजगारी, भ्रष्टाचार कुशासन परास्त गर्न चाहन्छौँ,’ उनले भने, ‘काँग्रेसले अब देशमा समस्याका रूपमा देखिएका यी सबै समस्यालाई परास्त गरेर सुशासन र समृद्धिको नेतृत्व गर्न चाहन्छ ।’

नेपाली काँग्रेस कमी कमजोरी स्वीकार गरेर अघि बढेको पार्टी भन्दै उनले नेतृत्व मात्र नयाँ नभै विषयगत रूपमा समेत प्रस्ट बनेर आएकाले यसलाई आम मतदाताले ख्याल गर्नुपर्ने बताए । ‘नेतृत्व मात्र नयाँ आएको विषय सामान्य होला,’ उनले भने,‘तर विचारगत पक्षबाट नयाँ भएको गम्भीर विषय हो । यसलाई मतदाताले ख्याल गर्नुपर्छ ।’

विगतमा दलहरू मिलेर बनेको गठबन्धनले नागरिकको छनोटको सुविधा साँघुरो बनाएको भन्दै विचार नमिल्ने दलका सदस्यको भोट एकै ठाउँमा राखेर जित्ने परिस्थितिले विचार विजयी भएको मान्ने स्थिति नबनेकाले आफूहरूले त्यो हटाएको बताए ।

महामन्त्री पौडेलले नागरिकको अपेक्षाअनुसार बोझिलो राज्य संरचनालाई छरितो बनाउनुपर्ने बताए । ‘अब २७५ को संसद् २०१ मा ल्याइनुपर्छ । संघीय मन्त्री मण्डल २५ बाट १५ मा झार्नुपर्छ । प्रदेशका ३ देखि ५ सम्मको मन्त्रीमण्डल बनाउनुपर्छ । संघीयता हटाउने हैन बोझिलोलाई छरितो बनाउनु जरुरी छ,’ उनले भने ।