काठमाडौं - नेपाली काँग्रेस केन्द्रीय कार्यसमितिको बैठकले पार्टीको १५ औँ महाधिवेशनका लागि आवश्यक कार्य तालिका सर्वसम्मत रूपमा पारित गरेको छ । बैठकपछि पार्टीका प्रवक्ता डा.प्रकाश शरण महतले जानकारी दिँदै महाधिवेशन आगामी २०८२ पुस २६, २७ र २८ गते गर्ने निर्णय भएको बताए ।

उनका अनुसार बैठकले पार्टी संरचना सुदृढीकरण तथा महाधिवेशन तयारीका विषयमा विस्तृत छलफल गरेको थियो । महतले भने, ‘बैठकले लामो छलफलपछि १५ औँ महाधिवेशनका सन्दर्भमा महत्त्वपूर्ण निर्णयहरू गरेको छ । काँग्रेसको १५ औँ महाधिवेशन २०८२ पुस २६,२७ र २८ गते हुने गरी प्रस्तावित कार्य तालिका केन्द्रीय समितिमा पेस गरिएको थियो र त्यो सर्वसम्मत रूपमा अनुमोदन गरिएको छ ।’

बैठकले मङ्सिर २० गतेभित्रै पुराना तथा नयाँ क्रियाशील सदस्य वितरणको काम केन्द्रीय कार्यालयमार्फत सम्पन्न गर्ने निर्णय गरेको छ । त्यस्तै, पुस ८ गतेसम्म सबै निर्वाचन क्षेत्रमा क्रियाशील सदस्यता नवीकरण तथा नयाँ सदस्यता सम्बन्धी कार्य पूरा गर्ने निर्णय पनि गरिएको छ ।

काँग्रेसले महाधिवेशन तयारीलाई सङ्गठन सुदृढीकरणसँग जोडेर आगामी दिनमा आवश्यक प्रक्रिया द्रुत गतिमा अघि बढाउने जनाएको छ ।

यस्तो छ काँग्रेसको १५औँ महाधिवेशन तालिका

नयाँ क्रियाशील सदस्य वितरण मङ्सिर २० सम्म

नयाँ क्रियाशील सदस्यको फाराम पठाउने– मङ्सिर २४ सम्म

सबै निर्वाचन क्षेत्रमा नयाँ क्रियाशील सदस्यताको काम सक्ने पुस ८ सम्म

नयाँ र नवीकरण गरिएका सदस्यता अन्तिम सूची बुझाउने– पुस १४

विदेशस्थित जनसम्पर्क समितिको अधिवेशन– पुस १५

गाउँ नगर र वडा अधिवेशन– पुस १६

गाउँ नगरपालिका अधिवेशन पुस १७

प्रदेशसभा क्षेत्रीय अधिवेशन पुस १९

प्रतिनिधिसभा क्षेत्रीय अधिवेशन पुस २१

एकभन्दा बढी प्रतिनिधिसभा क्षेत्र भएको जिल्ला अधिवेशन– पुस २२

प्रदेश अधिवेशन २३ र २४ गते ।

महाधिवेशन पुस २६, २७ र २८ गते ।