काठमाडौं - ललितपुरको जावलखेलमा १८ औँ गोदावरी फूलको प्रतियोगितात्मक प्रदर्शनी चार दिनदेखि दिन जारी छ ।फ्लोरिकल्चर एशोसिएसन नेपालको आयोजनामा जारी प्रदर्शनीमा शनिबारसम्म ३४ हजार ८ सय जना भन्दा बढी अवलोकर्ताले अवलोकन गरेका छन् । असोज २९ गतेदेखि सुरु भएको मेलामा पहिलो दिन सात हजार २ सय जना, दोस्रो दिन सात हजार ५ सय, तेस्रो दिन आठ हजार ६ सय जना र चौथो दिन अर्थात् शनिबार आज ११ हजार ५ सय जनाले अवलोकन गरेको एसोसिएसनले जनाएको छ ।

चार दिनमा ३४ हजार ८ सय जनाले अवलोकन गर्दा एक करोड तीन लाख रुपियाँ भन्दा बढीको कारोबार भएको एसोसिएसनले जनाएको छ ।

शनिबार भएको कारण अरू दिनको तुलनामा बढी अवलोकनकर्ता आएका थिए र सोही अनुसार कारोबार भएको एसोसिएसनले जनाएको छ ।

शनिबार बागमती प्रदेश सरकार, कृषि तथा पशुपन्छी विकास मन्त्री मधुसुदन पौडेल, बागमती प्रदेशका पूर्व मुख्यमन्त्री राजेन्द्र पाण्डेले मेला अवलोकन गरेका थिए ।

आइतबारसम्म चल्ने मेलामा ४० हजार भन्दा बढीले प्रत्यक्ष अवलोकन तथा एक करोड तीस लाख रुपियाँ भन्दा बढीको व्यवसायिक कारोबार हुने आयोजकले अनुमान गरेको छ ।  नजिकै आइरहेको तिहार तथा छठ पर्वलाई समेत लक्षित गरी गोदावरी पुष्प मेला तथा प्रदर्शनी गरिएको फ्लोरीकल्चर एसोसिएसन नेपालले जनाएको छ ।

गोदावरी फूलको एक मात्र बृहत् प्रदर्शनी रहेको यस मेलमा व्यावसायिक स्टल ८०, प्लान्ट क्लिनिक स्टल १, अफिसियल स्टल ५, प्रतियोगितात्मक स्टल २, र फोटो सेल्फी स्टल २ गरी जम्मा ९० वटा प्रदर्शनी कक्षहरु रहेको छ । विगत वर्षमा झैँ यस वर्ष पनि गोदावरी फूलको चार वटा विधा (मिनियचर, रिफ्लेक्स, स्पाईडर र  ईनकर्भ) मा प्रतिस्पर्धा गरिएको थियो ।

देशभर ५२ जिल्लामा करिब २७० हेक्टरमा पुष्प खेती हुँदै आइरहेको छ । हाल एक हजार २३५ भन्दा बढी व्यवसायी यस क्षेत्रमा संलग्न छन् र करिब ५३ हजारभन्दा बढी जनशक्ति प्रत्यक्ष–अप्रत्यक्ष रूपमा रोजगारमा पाएका छन् ।

पुष्प व्यवसायमा करिब आठ अर्ब ८३ करोड रुपैयाँ लगानी भएको अनुमान छ । वार्षिक कारोबार तीन अर्ब ३७ करोड रुपियाँ पुगेको फ्यानले जनाएको छ । आयोजकका अनुसार पुष्प बजारमा हरेक वर्ष १० देखि १५ प्रतिशतले माग बढ्दै गएको छ ।