काठमाडौं - नारायणहिटी दरबार हत्याकाण्ड भएको २४ वर्ष पूरा भएको छ । हरेक महिनाको तेस्रो शुक्रबार चल्ने भोजका समयमा २०५८ जेठ १९ गते राति दरबार हत्याकाण्ड भएको थियो । राजदरबारको ‘अति सुरक्षित’ स्थलमा तत्कालीन राजा वीरेन्द्र, रानी ऐश्वर्य, युवराज दीपेन्द्रलगायत परिवारका अन्य सदस्यको हत्या भएका थियो ।

उक्त घटनाबारे २४ वर्ष पुरा हुँदा पनि सत्य तथ्य सार्वजनिक भएको छैन । घटनापछिका हरेक सरकारहरूले दरबार हत्याकाण्डको रहस्य पत्ता लगाएरै छाड्ने आश्वासन दिँदै आएका छन् । दर्जनौँ पटक सरकार परिवर्तन हुँदा पनि आजसम्म  घटना रहस्यकै गर्भमा छ ।

राजा वीरेन्द्रको वंश नाश हुने गरी भएको सो हत्याकाण्डको सम्झना गर्दा अहिले पनि जनता शोकमग्न हुन्छन् ।  घट्नाको स्मरण गर्दा आम सर्वसाधारण भावुक हुने गर्छन् । 

सुर्खेतका सुर्य बहादुर सिंह नेपालको इतिहासका लागि जेष्ठ १९ गते नेपाली जनताको लागि कालो दिन रहेको बताउँछन् । कोही पनि नेपालीले यस दिनलाई कहिल्यै बिर्सन नसकिने बताएका छन् । राजसंस्थाको सन्दर्भमा कुरा गर्दा विश्वभर शिर ठाडो गरी हिड्नसक्ने अवस्था रहेको भए पनि हत्याकाण्डका बारेमा सत्य तथ्य एवं निष्पक्ष छानबिन नहुनु दुःखद भएको उनको भनाइ छ । 

उनले भने ‘नेपालको इतिहासको लागि जेष्ठ १९ गते नेपाली जनताको लागि कालो दिन हो । जनताले यस दिनलाई कहिल्यै बिर्सन सक्दैनन् । नेपालमा गणतन्त्र आएको १७ वर्ष हुँदा पनि राजाको स्थान नहुनु दुखद हो ।’

त्यस्तै दाङका सुशील लामिछानेले राजाको शासनमा खुलेर बोल्न पाएको तर अहिले गणतन्त्रको शासनमा सबैभन्दा धेरै भ्रष्ट्राचार बढिरहेको बताए । 

उनले ‘राजाको शासन खुलेर बोल्न पाइन्थ्यो । गणतन्त्रको शासनमा सबैभन्दा धेरै भ्रष्ट्राचार बढीरहेको छ । आफ्ना नातागोतालाई बढी प्रथामिकता दिएका कारण अवस्था बिग्रिएको छ ।’

तर तनहुँका  भगिरथ घिमिरे गणतन्त्रवादीहरूले नै राजदरबार हत्याकाण्डका बारेमा छानबिन हुन नदिएको आरोप लगाएका छन् । घटना भएकै दिन नयाँ राजालाई नारायणहिटी भित्र्याउने योजनालाई दलहरूले रोकेको उनी जिकिर गर्छन् । अब आन्दोलनबाटै राजालाई नारायणहिटी भित्र्याउने उनको योजना छ । 

सुर्खेतका मान बहादुर खरेलले पनि राष्ट्रभक्तहरूले जेठ १९ लाई कालो दिनको रूपमा लिइरहेको बताए । तीन ठूला राजनीतिक दलहरू मिलेर जनताको राम्रो व्यवस्थालाई झुलाइ रहेको  समेत आरोप लगाए । 

त्यस्तै सुर्खेतकै अर्का पदम राज जोशीले एमाले र काँग्रेस मिलेर जेष्ठ १९ गतेको घटना घटाइएको आरोप लगाएका छन् । उनले विश्वमा नेपाली जनता चिनाउन राजा नै चाहिने बताए ।

‘नेपालका राजनीतिक दलहरू विषेशगरी एमाले र काँग्रेस मिलेर जेष्ठ १९ गतेको घटना घटाइएको हो । राष्ट्र र राष्ट्रियताको लागि राजा नै सर्वस्व हुनुहुन्थ्यो । विश्वमा नेपाली जनता चिनाउन राजा नै चाहिन्छ । भ्रष्टाचारीले देश बेचिसकेकाले मृत्युदण्डको व्यवस्था मिलाउन राजा आवश्यक रहेको छ’  ।