काठमाडौं - प्रधानमन्त्री केपी शर्मा ओलीले आज शाही दमन चिरेर जनताले इतिहास लेखेको दिन भएको बताएका छन् । बिहीबार सामाजिक सञ्जालमार्फत गणतन्त्र दिवसको अवसरमा शुभकामना दिँदै उनले सिंहासनको अभिमान तोडेर नागरिकको स्वाभिमान स्थापित भएको दिन भएको बताएका छन् ।

उनले लेखेका छन्,‘शाही दमन चिरेर जनताले इतिहास लेखेको दिन हो आज। मुकुटको होइन—मुलुकको हितले स्थान पाएको दिन, सिंहासनको अभिमान तोडेर नागरिकको स्वाभिमान स्थापित भएको दिन, जनताको सात दशक लामो बलिदानी पूर्ण सङ्घर्षले विजय प्राप्त गरेर गणतन्त्र आर्जन गरेको दिन। गणतन्त्र दिवसको गरिमामय अवसरमा स्वदेश तथा विदेशमा रहनु भएका सम्पूर्ण नेपाली दिदीबहिनी तथा दाजुभाइहरूलाई हार्दिक शुभकामना।