विराटनगर - कोशी प्रदेश प्रहरी प्रमुख डिआइजी (प्रहरी नायब महानिरीक्षक) ईश्वर कार्कीले प्रदेशमा प्रहरी सेवा जनउत्तरदायी, परिणाममुखी र प्रभावकारी बनाउने प्रतिबद्धता जनाएका छन् । विराटनगरस्थित प्रदेश प्रहरी कार्यालयमा आयोजित पत्रकार सम्मेलनमा उनले आगामी कार्य योजना सार्वजनिक गर्दै प्रतिबद्धता जनाएका हुन् ।

१५ दिनअघि मात्र प्रदेश प्रमुखको जिम्मेवारी सम्हालेका डिआइजी कार्कीले ‘बेस्ट पुलिसिङ’ अवधारणाअनुसार सङ्गठनलाई जनमैत्री, पारदर्शी र उत्तरदायी बनाउने योजना सुनाए। उनले भने, ‘अबको प्रहरी सेवा नतिजामुखी हुनेछ । जनताले अनुभूति गर्ने गरी व्यवहारिक सुधार ल्याइन्छ। अबको परिवर्तन कागजमा मात्र होइन, व्यवहारमै देखिन्छ ।’ उनले कार्यभार सम्हालेदेखि पछिल्लो १५ दिनभित्र फरार रहेका ४५ जना दोषी प्रतिवादी पक्राउ गरिएको जानकारी दिए । तीमध्ये कतिपय १६ वर्षसम्मको कैद सजाय भोग्नुपर्ने र २६ लाख रुपैयाँ बराबरको जरिवाना तिर्नुपर्ने अवस्थामा थिए। उनले प्रतिवादी पक्राउ अभियानलाई प्रहरीको ‘मिसन’को रूपमा अघि बढाइएको बताए ।

कार्कीका अनुसार पछिल्लो समयमा कोशी प्रदेशमा लागु औषधको समस्या गम्भीर बन्दै गएको छ। ‘१५ दिनमै १,२०० किलो गाँजा र ३०० ग्राम ब्राउन सुगर (खैरो हेरोइन) बरामद गरिएको छ,’ उनले बताए । लागु औषध नियन्त्रणमा प्रहरी मात्र होइन, विद्यालय, समुदाय र सामाजिक संस्थाको सहकार्य अपरिहार्य भएको कार्कीको भनाइ छ । उनले भन्सार छली तथा चोरी तस्करी नियन्त्रणका लागि सशक्त अभियान सञ्चालन भइरहेको बताए। पछिल्लो दुई सातामा ४ करोडभन्दा बढीको अवैध सामान बरामद गरी भन्सारमा बुझाइएको जानकारी दिँदै उनले अब सशस्त्र प्रहरी, भन्सार र स्थानीय प्रशासनसँग समन्वय गरेर थप कठोर कदम चालिने बताए ।

यातायातका सन्दर्भमा ट्राफिक अनुशासनहीनता र सवारी चालकको लापरबाहीलाई सडक दुर्घटनाको प्रमुख कारण ठहर गर्दै कार्कीले ट्राफिक सुधारमा पनि जोड दिने योजना सुनाए । समुदाय–प्रहरी साझेदारीलाई अझ सशक्त बनाउने प्रतिबद्धता व्यक्त गर्दै डिआइजी कार्कीले प्रहरीको भूमिका अपराध नियन्त्रणमा मात्र सीमित नराखी समाजसँगको सम्बन्ध बलियो बनाउने बताए । ‘शान्ति सुरक्षा कायम राख्न दीर्घकालीन नीतिगत सोच आवश्यक छ,’ उनले भने, ‘प्रहरीको प्रयास मात्र पर्याप्त हुँदैन, समग्र प्रणालीको सुधार जरुरी छ ।’