काठमाडौं - साउथ एशियन इन्स्टिच्युट अफ म्यानेजमेन्ट साइम कलेज र टोक्मा टेक्नोलोजिजबीच समझदारीपत्रमा हस्ताक्षर भएको छ । यो सम्झौताले नेपालमा सीप विकास, अनुसन्धान, र प्राविधिक नवप्रवर्तनलाई प्रवर्धन गर्ने लक्ष्य राखेको छ । ललितपुरमा कार्यक्रम आयोजना गरी साइम कलेजका प्राचार्य अशोकराज पाण्डे र टोक्मा टेक्नोलोजिजका निर्देशक सागर आङदेम्बेले आ–आफ्नो संस्थाका तर्फबाट सम्झौतामा हस्ताक्षर गरेका हुन् ।

यस सम्झौताअनुसार, विद्यार्थीहरूका लागि इन्डस्ट्रीसँग सम्बन्धित इन्टर्नसिप, संयुक्त अनुसन्धान परियोजना, पाठ्यक्रम सुदृढीकरण, कार्यशाला, विशेषज्ञद्वारा सञ्चालित सत्र, ह्याकाथन, तथा नवप्रवर्तन चुनौतीहरू आयोजना गरिनेछ, जसले विद्यार्थीलाई व्यावहारिक ज्ञानमा दक्ष बनाउनेछ ।

कम्प्युटर एशोसिएशन नेपाल महासंघका उपाध्यक्ष चिरञ्जीवी अधिकारीले यस सहकार्यलाई ‘प्रभावकारी पहल’ का रूपमा व्याख्या गरे । उनले भने, ‘साइम कलेज र टोक्मा टेक्नोलोजिजको यो सहकार्यले नेपालका युवाहरूलाई उद्योगमै काम गर्न सक्ने क्षमतासहित तयार गर्नेछ ।’ उनको अनुसार, यो कदम नेपाललाई आइटी हब बनाउने राष्ट्रिय उद्देश्यसँग मेल खान्छ ।

कार्यक्रममा साइम कलेजका प्राचार्य पाण्डेले वर्तमान शिक्षा प्रणालीमा उद्योगसँगको सहकार्यको महत्त्व उल्लेख गर्दै भने, ‘यो समझदारी हाम्रो विद्यार्थीलाई व्यवहारिक ज्ञान प्रदान गर्ने र भविष्यको डिजिटल अर्थतन्त्रमा प्रतिस्पर्धी बनाउने दिशामा महत्त्वपूर्ण पाइला हो ।’

सम्झौता तीन वर्षका लागि प्रभावकारी हुनेछ र परस्पर सहमतिमा विस्तार गर्न सकिनेछ। साइम कलेजले इन्टर्नसिप र प्रोजेक्टका लागि विद्यार्थी सिफारिस गर्ने, आवश्यक शैक्षिक सहयोग तथा पूर्वाधार उपलब्ध गराउने, र संयुक्त परियोजनाका लागि संकायसँग समन्वय गर्नेछ ।

त्यसैगरी, टोक्मा टेक्नोलोजिजले इन्टर्नसिप र अनुसन्धान परियोजनाको अवसर प्रदान गर्ने, विद्यार्थी तथा संकायलाई उद्योगसम्बन्धी मार्गदर्शन र विशेषज्ञ सत्रहरू सञ्चालन गर्ने, तथा पाठ्यक्रम समीक्षामा सहभागी भई संयुक्त कार्यक्रम आयोजना गर्नेछ ।