काठमाडौं - गएरातिदेखि परेको अविरल वर्षासँगै देशका विभिन्न राजमार्गहरू अवरुद्ध भएका छन् । नेपाल प्रहरीका अनुसार कान्ति लोकपथ र पूर्व-पश्चिम राजमार्ग अवरुद्ध भएका छन् । कान्ति लोकपथ ललितपुर जिल्लाको बालुवा गाउँपालिका-२ मा अवरुद्ध भएको छ । यस्तै पूर्व पश्चिम राजमार्ग नवलपरासी पूर्वको विनयी त्रिवेणी गाउँपालिका -२ चौसठ्ठीमा वर्षाका कारण अवरुद्ध भएको हो ।
यस्तै, विनयी त्रिवेणी गाउँपालिका -१ विनयी खोलामा बाढी आएर अवरुद्ध भएको सडक एकतर्फी खुलेको छ । यस्तै, पृथ्वीलोक मार्ग र अरनिको राजमार्ग एकतर्फी सञ्चालनमा आएका छन् । अरनिको राजमार्गको भोटेकोशी गाउँपालिका-२ कोप्लाङमा सडक एकतर्फी खुलेको छ । जहाँबाट साना सवारी साधनमात्रै सञ्चालनमा आएका छन् ।
पृथ्वीलोक मार्ग धादिङको बेनीघाटरोराङ गाउँपालिका -७ कृष्णभीरमा पहिरो गएको छ । पहिरोका कारण अवरुद्ध सडक एकातर्फी रूपमा सञ्चालनमा आएको छ ।
