धनगढी - डोटीका एक युवाको गोली लागेर मृत्यु भएको छ ।  बडीकेदार गाउँपालिका–२, बर्छैनका २४ वर्षीय नरेश सार्कीको सिकार खेल्ने क्रममा गोली लागेर मृत्यु भएको हव । 

जिल्ला प्रहरी कार्यालय डोटीका अनुसार बिहीबार दिउँसो बडीकेदार गाउँपालिका–१, बेडुपाटा खोलाको किनारमा सिकार खेल्ने क्रममा सार्कीको घटनास्थलमै मृत्यु भएका हो । 

सिकारका लागि लिएको भरुवा बन्दुक अचानक पड्किँदा नरेश सार्कीको दायाँ छातीमा गोली लागेको र घटनास्थलमै मृत्यु भएको प्रहरी चौकी खड्यौलीका प्रमुख विरादत्त पन्तले जानकारी दिए।

उक्त बन्दुक बडीकेदार–१ रजेडका ४८ वर्षीय कमल सिंह खड्काले बोकेका थिए।

घटनामा संलग्न रहेका बडीकेदार गाउँपालिका–१ रजेडका कमल सिंह खड्का, खेम खड्का, तारा सिंह खड्का, बडीकेदार–२ बर्छैनका तेजेन्द्र भाट, अम्मर शाह, चक्र भाट, सुनील बम, गणेश घर्तीमगर, मान बहादुर शाह, तथा बडीकेदार–२ गर्भुजाका जुलेश नामजाली मगरलाई प्रहरीले पक्राउ गरी थप अनुसन्धान थालेको डोटी जिल्ला प्रहरी कार्यालयका प्रहरी उपरीक्षक विनोद शर्माले जानकारी दिए।